Segja búfénaði ekkert meint af vegna bilunar í mengunarbúnaði

Búfénaður í grennd við Fjarðarál hefur ekki skaðast þrátt fyrir bilun í mengunarvarnarbúnaði álversins í Reyðarfirði, samkvæmt rannsóknum dýralæknisins Freydísar Dönu Sigurðardóttur og flúorvöktun Tilraunastöðvar HÍ á Keldum, Nýsköpunarmiðstöð Íslands og Náttúrustofu Austurlands.

Rannsóknir voru gerðar á beinasýnum dýranna en mengunarbúnaðurinn bilaði síðasta sumar og olli því að hækkun varð á flúorgildi í grasi. Í tilkynningu frá Alcoa segir að í skýrslu dýralækna um skoðun á beinsýnum úr ellefu kindum frá bænum Sléttu, að tennur og kjálkabein sýni engin merki um flúoreitrun. Þó var flúor í beinum yfir þúsund míkrógrömm á hvert gramm af beinösku og sýndi rannsóknin jafnframt fram á að meðalstyrkur flúors hefur aukist frá árinu 2006, eða áður en Fjarðarál hóf framleiðslu.

Í kjölfar þess að starfsmenn Fjarðaáls áttuðu sig á biluninni var Náttúrustofu Austurlands, Tilraunstöð Háskóla Íslands á Keldum og Nýsköpunarmiðstöð falið að kanna áhrif mengunarinnar á heyfeng og búfénað í firðinum. Byrjað var að kanna ástand heyfengs og leiddi sú rannsókn í ljós að flúor í heysýnum var undir mörkum í 15 sýnum af 17.

Skömmu fyrir áramót bárust síðan niðurstöður dýralæknis á sjónrænni skoðun á þrjátíu grasbítum á svæðinu. Samkvæmt skýrslu hans bendir ekkert til að þeir hafi orðið fyrir flúoreitrun af völdum þessarar tímabundnu flúoraukningar í útblæstri frá Fjarðaáli. Þar sem hluti grasbíta í Reyðarfirði étur enn hey af umræddum túnum í Reyðarfirði verður áfram fylgst með ástandi bústofns.