Viðbrögð við Icesave-dómi þurfa að vera upplýst

Árni Páll Árnason, starfandi formaður utanríkismálanefndar Alþingis, segir mikilvægt að yfirlýsingar í kjölfar dómsins í Icesave-málinu verði ekki handahófskenndar. Fylgst verði með viðbrögðum Íslendinga og því skipti máli hvernig haldið sé á málum.

Utanríkismálanefnd fundaði í morgun með fulltrúum úr málaflutningateymi Íslands vegna dómsins sem EFTA-dómstóllinn mun kveða upp á mánudaginn. Í samtali við Vísi segir Árni Páll að nefndarmenn hafi fengið upplýsingar frá teyminu um hvernig viðbrögðunum verði hagað.

„Okkur var tilkynnt viðbragðsáætlun málsvarnarteymisins sem starfar áfram til að undirbúa viðbrögð við dómnum," segir Árni Páll. Málsvarnarteymið muni upplýsa nefndina um mat sitt á niðurstöðunni þegar hún liggur fyrir.

„Hugmyndin á bak við þetta teymi og undirbúningsvinnuna er að menn séu viðbúnir og geti gefið yfirlýsingar í svipaða átt í byrjun. Það verður auðvitað fylgst með viðbrögðum og ef niðurstaðan yrði á verri veginn skiptir auðvitað máli hvernig við höldum á málum. Hvernig við túlkum niðurstöðuna og gætum hagsmuna Íslands í þeim efnum," segir Árni Páll sem fer með formennsku í nefndinni í fjarveru Árna Þórs Sigurðssonar, þingmanns Vinstri Grænna.

Hann segir mikilvægt að nefndin fái trausta greiningu á niðurstöðu dómsins sem fyrst.

„Að við séum ekki að bíða eftir alvöru greiningu í dag eða tvo að bíða eftir alvöru greiningu og gefa yfirlýsingar holt og bolt um skilning á dómnum. Það er mjög mikilvægt að allir fái bestu upplýsingar til þess að móta afstöðu sína á," segir Árni Páll. Engum sé þó meinað að tjá sig um niðurstöðuna.

„Eftir sem áður hafa þingmenn fullt frelsi hvernig þeir tjá sín pólitísku viðbrögð í kjölfar dómsins. En það er mjög mikilvægt að allir hafi bestu fáanlegu upplýsingar tiltækar."

Hann segir málsteymismenn ekki hafa viðrað skoðun sína á líkum þess að dómurinn falli Íslandi í vil.

„Nei, þeir voru í sjálfu sér á sama stað og þegar þeir ræddu við okkur eftir málflutninginn. Það er ljóst að sú vinna sem farið hefur fram á undanförnum misserum til að stilla saman strengi í málsvörninni hefur skipt miklu máli og hefur skilað mjög góðum árangri," segir Árni Páll.