Varð fyrir kattarárás

Sjaldgæft er að fólk verði fyrir árás katta, en slíkt mál var tilkynnt til lögreglunnar á dögunum.

Karl á fimmtugsaldri hringdi þá og greindi frá því að köttur hefði ráðist á hann í vesturborginni.

Í dagbók lögreglu kemur fram að lögreglan hafi verið fljót á staðinn og hitt manninn að máli.

Hann reyndist óslasaður eftir viðskipti sín við köttinn, en sá síðarnefndi fannst ekki þrátt fyrir nokkra leit.

Maðurinn hugðist ekki aðhafast neitt frekar í málinu, en taldi mikilvægt að tilkynna það, ekki síst ef kötturinn ætti aftur eftir að koma við sögu hjá lögreglu.