Hægt að veðja um ákvörðun Ólafs Ragnars

Veðmálafyrirtækið Betsson hefur sett upp veðmál á síðu sinni, betsson.com, um hvaða ákvörðun Ólafur Ragnar Grímsson tekur hvað varðar lög um veiðileyfagjald. Nánar tiltekið er þetta á netlengju Betsson. Málið er gríðarlega spennandi og alveg þess virði að veðja á, að mati þeirra sem stýra veðmálastarfsemi Betsson. Veðmálið meta þeir svo mikilvægt að það verður á heimsvísu og geta menn veðjað um þetta um heim allan, á 22 tungumálum í þremur heimsálfum. Betsson-menn meta það svo að líklegra sé að hann neiti að skrifa undir.

Spurningin sem veðmálið snýst um er svohljóðandi:

Mun forseti Íslands, Ólafur Ragnar Grímsson, vísa lögum um veiðileyfagjald í þjóðaratkvæðagreiðslu?

Já - Stuðullinn við því er 1.67 (55% líkur)

Nei - Stuðullinn við því er 2.05 (45% líkur)

Ólafur Ragnar miðdepill atburða

Frumvarp sjávarútvegsráðherra, sem miðar að lækkun veiðileyfagjalda, var samþykkt á Alþingi í nótt þrátt áskorun ríflega 35 þúsund einstaklinga um að Alþingi hafnaði frumvarpinu. Undirskriftirnar verða nú afhentar forseta Íslands.

Þannig er ljóst að nú kemur til kasta forseta Íslands, Ólafs Ragnars Grímssonar en aðstandendur undirskriftasöfnunarinnar tóku fram að ef Alþingi hunsuðu undirskriftirnar yrði forsetanum afhentar undirskriftirnar. Samkvæmt upplýsingum frá Alþingi fara lögin í prentun í dag eða á mánudag. Einhverja daga tekur að prenta skjalið í prentsmiðjunni, einn til tvo og við svo búið er farið með lögin til forseta til undirritunar. Kastljósið beinist því enn og aftur að Ólafi Ragnari: Mun hann skrifa undir eða synja lögum staðfestingar og vísa til þjóðaratkvæðagreiðslu, þegar hann fær lögin snemma í næstu viku? Gera má ráð fyrir því að hann verði með lögin í höndum í um viku tíma. En óvíst er hvenær ákvörðun hans liggur fyrir.

Ætti að segja já

Gunnar Helgi Kristinsson, prófessor í stjórnmálafræði við Háskóla Íslands, er ekki viss um hvar hann ætlar að setja peninginn:

„Miðað við það hvernig Ólafur hefur hagað gjörðum sínum og ummælum í fortíðinni mætti ætla að hann muni synja þessu lagafrumvarpi um undirskrift, það er að segja, ef forsendurnar eru: 35 þúsund undirskriftir gegn lögunum liggja fyrir, 70 prósent þjóðarinnar eru á móti því að lækka auðlindagjaldið, og fyrri ummæli hans sjálfs skipta þarna líka verulegu máli; um þjóðaratkvæðagreiðslur almennt séð, hann hefur lýst því þannig að hann sé eiginlega verkfæri svona undirskriftasafnana við að framkalla þjóðaratkvæðagreiðslur og hann hefur líka lýst því yfir að veiðileyfakerfið henti sérstaklega vel til þjóðaratkvæðagreiðslu. Með alla þessa hluti í huga þá myndi maður ætla að það lægi nokkuð beint við að hann myndi neita að skrifa undir."

En gæti allt eins skrifað undir

En málið er alls ekki svona einfalt, eins og Gunnar Helgi bendir á: „Á móti kemur að Ólafur Ragnar virðist hafa verið velviljaður þessari stjórnarmyndun, verið í tengslum við þá stjórnmálaforingja sem að henni komu og af þeim sökum telja ýmsir ástæðu til að ætla að hann myndi gjarnan vilja veigra sér við að synja þessu. Þá er spurning hvort hann finni einhvern flöt á því, ef rétt er. Þetta vald sem hann hefur til að synja um undirskrift er hreint geðþóttavald. Þannig að hann þarf í sjálfu sér ekki að búa til merkilegan rökstuðning. En það vill þannig til að hann er flinkur í því að búa til rökstuðning fyrir sínum ákvörðunum – eftir á.“

Þannig að þetta er æsispennandi?

„Ég myndi dreifa mínum fjármunum á ólíka kosti,“ segir Gunnar Helgi.