Gert að aka 550 km með heimilissorpið

Sveitarstjóri Mýrdalshrepps segir synjun um undanþágu til urðunar á Skógasandi þýða 400 kílómetra akstur með sorp í Álfsnes. Umhverfisráðuneytið segir sveitarfélagið hafa aðra möguleika til urðunar. Undanþágan sé ekki nauðsynleg.

Ekki er ástæða til að framlengja undanþágu sem Hula bs. hefur haft til að urða úrgang í stöð sinni á Skógasandi í Rangárþingi eystra.

Að því er segir í umsögn Umhverfisstofnunar í ágúst var í maí í fyrra veitt svigrúm til rannsóknar á grunnvatninu við urðunarstöðina. Sú athugun eigi að taka eitt ár og niðurstöður hennar eigi að vera grundvöllur að frekara áhættumati á staðnum.

„Í ljósi framvindu málsins gerir Umhverfisstofnun ekki athugasemdir við að veitt verði tímabundin undanþága frá starfsleyfi fyrir urðunarstaðinn á Skógasandi 1. janúar 2014," segir stofnunin en umhverfisráðuneytið kemst að annarri niðurstöðu. Í fyrsta lagi sé ráðherra ekki heimilt að veita undanþágu frá kröfum hvað varði „jarðfræðilega tálma og botnþéttingu" og í öðru lagi þurfi ríkar ástæður fyrir undanþágu frá starfsleyfi.

„Slíkur rökstuðningur geti til dæmis falist í því að um sé að ræða neyðarúrræði til förgunar úrgangs frá því svæði sem urðunarstaðurinn þjónar því allir aðrir farvegir til förgunar hafi verið fullkannaðir og reynst ómögulegir. Að mati ráðuneytisins liggur ekki fyrir að aðrar leiðir til förgunar úrgangs frá sveitarfélaginu séu ómögulegar," segir umhverfisráðuneytið og boðar að það muni hafna beiðni um undanþágu.

Sveitarstjórn Mýrdalshrepps, sem er aðili að Hulu, kveðst mótmæla harðlega þessari fyrirætlun umhverfisráðuneytisins. „Það segir sig sjálft að ef ekki verður hægt að urða á þessum stað, sem frá náttúrunnar hendi er trúlega einn besti staðurinn sem völ er á til urðunar hér á landi, er ekki annar kostur í sjónmáli en að flytja úrgang frá okkur til Sorpu í Álfsnes," segir Ásgeir Magnússon sveitarstjóri.

Skaftárhreppur er einnig aðili að Hulu. „Það er búið að loka sorpbrennslunni þeirra og þá höfðu þeir til vara að geta urðað heimilisúrgang á Skógasandi. Þetta þýðir akstur upp á 400 kílómetra fyrir okkur í Mýrdalshreppi og 550 kílómetra fyrir Skaftárhrepp með tilheyrandi mengun," segir Ásgeir.

Sveitarstjórinn bendir þó á að ákvörðun umhverfisráðuneytisins sé enn ekki endanleg: „Alltaf er nú von til þess að ráðuneytið taki mark á því sem frá okkur kemur."