Ólafur Ragnar lét Gordon Brown heyra það

Ólafur Ragnar Grímsson, forseti Íslands, lét Gordon Brown, fyrrverandi forsætisráðherra Bretlands, heyra það á ráðstefnu um efnahagsmál sem stendur nú yfir í Davos í Sviss.

Í viðtali við bresku fréttastofuna Sky News sagði forsetinn að Íslendingar myndu aldrei gleyma meðferðinni sem þeir fengu hjá breska forsætisráðherranum fyrrverandi eftir efnahagshrunið haustið 2008. Þá beittu Bretar hryðjuverkalögum á Íslendinga vegna Icesave-reikningana frægu.

Ólafur Ragnar sagði að Gordon Brown hefði orðið sér til skammar þegar hann ákvað að setja Íslendinga á lista með al Qaeda og Talíbönum. „Við Íslendingar erum ekki búnir að gleyma því," sagði Ólafur við Sky. Gordons Brown yrði minnst fyrir þetta á Íslandi næstu aldirnar, þótt að Bretar væru löngu búnir að gleyma honum.

Gordon Brown er einnig staddur á ráðstefnunni og tekur þar þátt í pallborðsumræðum.

Þá var íslenski forsetinn einnig spurður út í aðild Íslands að Evrópusambandinu og sagðist hann ekki gera ráð fyrir því að Ísland gengi í sambandið á meðan hann væri forseti. „Ef þú vilt að ég veðji, þá myndi ég tvímælalaust segja nei," sagði Ólafur Ragnar kokhraustur að vanda.

Umfjöllun Sky News má sjá hér.