Blær fær stuðning úr vestri

Stúlkan sem nú berst fyrir því að mega heita Blær hefur fengið skriflega stuðningsyfirlýsingu úr vesturátt.

Frá Norður Karólínu í Bandaríkjunum barst fallegt bréf frá einstaklingi að nafni Patrick, og í bréfinu lýsir hann aðdáun sinni, bæði á nafni Blævar og baráttu hennar fyrir að mega bera það löglega.

„Ég dáist að þér fyrir að bjóða stjórnvöldum birginn og fyrir að berjast gegn þessum óréttlátu reglum," segir í bréfinu, en móðir Blævar, ritstjórinn Björk Eiðsdóttir, höfðaði mál á hendur innanríkisráðherra í kjölfar úrskurðar mannanafnanefndar. Nefndin komst að þeirri niðurstöðu að Blær væri karlkynsorð og mætti stúlkan því ekki bera nafnið.

Mál Blævar hefur vakið heimsathygli og hafa fréttamiðlar á borð við CNN, NBC og Fox News fjallað um það. Í bréfinu hvetur Patrick hana til að gefast ekki upp. „Ef allir í Bandaríkjunum væru jafn hugrakkir og þú væri ástandið betra og stjórnvöld ekki svona spillt."

Aðalmeðferð málsins fór fram á mánudag og nú bíður Blær, sem á pappírum heitir Stúlka Bjarkardóttir Rúnarsdóttir, eftir úrskurði sem hún vonast til að ógildi niðurstöðu mannanafnanefndar.