Stefna um nýtingu landgæða

Umhverfis- og auðlindaráðherra, Svandís Svavarsdóttir, hefur lagt fram á Alþingi tillögu til þingsályktunar um landsskipulagsstefnu 2013-2024. Kveðið er á um slíka stefnu í skipulagslögum sem samþykkt voru á Alþingi haustið 2010.

Markmið landsskipulagsstefnu er að setja fram leiðarljós um nýtingu lands og landgæða sem tryggir heildarhagsmuni við gerð skipulagsáætlana um leið og hún stuðlar að sjálfbærri þróun og skilvirkri áætlanagerð. Stefnunni er einnig ætlað að samþætta áætlanir opinberra aðila um málaflokka sem varða landnotkun.

Þingsályktunartillagan um landsskipulagsstefnu felur í sér þrjár meginstefnur; stefnu um skipulagsmál á miðhálendi Íslands, stefnu um búsetumynstur og dreifingu byggðar og stefnu um skipulag á haf- og strandsvæðum.

Sú þingsályktunartillaga að landsskipulagsstefnu sem liggur fyrir á Alþingi var unnin í samráði við sveitarfélög og samtök þeirra, opinberar stofnanir, fyrirtæki og hagsmunasamtök. Að auki voru drög að tillögu Skipulagsstofnunar að landsskipulagsstefnu auglýst og kynnt auk þess sem þau voru send út til umsagnar fjölmargra aðila.