Landlæknir skoðar sjálfsvíg á geðdeild

Tveir sjúklingar á geðdeild Sjúkrahússins á Akureyri hafa svipt sig lífi á deildinni síðustu tvö ár. Síðara málið í skoðun hjá Landlækni. Tollur sem við verðum að greiða, segir forstöðumaður. Allt of mikið álag á geðdeildinni, segir lögreglan.

Tveir sjúklingar hafa framið sjálfsvíg inni á geðdeild Sjúkrahússins á Akureyri síðustu tvö ár. Hið síðara var í október í fyrra og samkvæmt upplýsingum frá Landlækni er það mál til skoðunar innan embættisins eins og verkferlar gera ráð fyrir.

Sigmundur Sigfússon, forstöðumaður geðdeildarinnar, segir atvikin ekki tengd mistökum eða vanrækslu starfsfólks.

„Þetta er bara tollur sem við þurfum að greiða. Við getum ekki sagt að mannslíf hafi tapast út af streitunni á deildinni,“ segir hann. „Ég á erfitt með að tala um einstök mál, en þetta er tíu rúma legudeild og það fer eftir því hversu margir eru nauðungarvistaðir á hverjum tíma hvernig álagið er. Ég var ekki í vinnunni þegar þetta var og veit ekki hvernig þetta gerðist, en deildin var fullmönnuð af starfsfólki. Það er töluvert af mannslátum í kring um þessa þjónustu, þó það gerist sjaldnast innan deildanna.“

Sigmundur segir atvik sem þessi ekki gera boð á undan sér. „Hver geðlæknir er með tíu til tuttugu manns sem eru í þessum áhættuhópi; sem eru að hugleiða á hverjum degi hvort lífið sé þess virði að lífa því. Þá er visst álag á okkur að fylgjast með þeim. En þetta er eitthvað sem við þurfum að búa við.“

Gunnar Jóhannsson, yfirmaður rannsóknardeildar lögreglunnar á Akureyri, segir ekkert hafa komið fram sem benti til sérstakrar vanrækslu.

„Þetta er hlutur sem starfsfólk á geðdeildum þarf alltaf að vera á varðbergi gagnvart. Sumt er hægt að koma í veg fyrir, svo er bara ekki hægt að koma í veg fyrir annað,“ segir hann. „En það er svakalegt álag hjá þeim. Maður hefði viljað sjá þá deild miklu stærri og öflugri.“

Fram hefur komið í fjölmiðlum að á geðdeild Landspítalans, sem rúmar á bilinu 120 til 150 inniliggjandi einstaklinga og er því margfalt stærri deild en sú á Sjúkrahúsinu á Akureyri, eru sjálfsvíg afar fátíð inni á deildunum. Talið er að á bilinu þrír til fjórir hafi tekið sitt eigið líf innan veggja spítalans á síðustu 20 árum.