Stefna um netöryggi Íslands verði tilbúin á næsta ári

Ekki liggur fyrir heildstæð stefna um netöryggi á Íslandi en stefnt er að því að ljúka því starfi á næsta ári. Viðbragðssveit hefur hafið störf og segir hópstjóri að ekki steðji meiri ógn að Íslandi en öðrum löndum.

Vonir standa til þess að heildstæð stefna um net- og upplýsingaöryggi og vernd ómissandi upplýsingainnviða er varða þjóðaröryggi verði tilbúin á næsta ári, að því er heimildir Fréttablaðsins herma. Nú þegar hefur netöryggissveit (CERT-teymi) verið sett á laggirnar. Þó á enn eftir að ljúka reglugerð um hlutverk hennar.

Þessi stefnumótun er í samræmi við fjarskiptaáætlun fyrir árin 2011 til 2014, þar sem einnig er kveðið á um að mikilvægir fjarskiptainnviðir verði skilgreindir og kortlagðir, lagarammar og stjórnsýsluábyrgð varðandi öryggisfjarskipti verði skýrð og mótaðar verði viðbragðsáætlanir um netárásir í samstarfi við fjarskiptafyrirtæki og neyðar- og viðbragðsaðila.

Auk þess er nú unnið að því á vegum almannavarnadeildar ríkislögreglustjóra, í samvinnu við lykilstofnanir, að semja viðbragðsáætlanir um netárásir.

Netöryggissveitin CERT-ÍS hefur þegar verið stofnuð og er starfandi innan Póst- og fjarskiptastofnunar. Hlutverk sveitarinnar, sem er skipuð þremur starfsmönnum, er að standa vörð um upplýsingainnviði gegn tölvuárásum og halda tjóni sem getur hlotist af slíkum árásum í lágmarki. Auk þess er hlutverk sveitarinnar að sjá um samskipti við netöryggissveitir í öðrum löndum. Ekki hefur enn verið lokið við allar reglugerðir um sveitina, sem lúta meðal annars að samskiptum samvinnu hennar við einkafyrirtæki á fjarskiptamarkaði, sem og í öðrum geirum. Þegar þeirri vinnu er lokið hefur sveitin formlega starfsemi.

Stefán Snorri Stefánsson fer fyrir sveitinni. Hann segir í samtali við Fréttablaðið að þrátt fyrir að reglugerðir um starfsemina séu ekki fullbúnar hafi mikið starf þegar verið unnið.

„Við höfum nýtt tímann vel til þess að byggja starfsemina upp. Við erum að fylgjast með ástandinu og bregðast við atvikum, auk þess sem við veitum ráðgjöf og samhæfum viðbrögð vegna alvarlegra atvika.“

Stefán segir atvik koma nokkuð reglulega upp hér á landi, en þau séu fæst mjög alvarleg og ennþá hafi ekki orðið vart við meiriháttar samhæfðar netárásir á íslensk skotmörk.

„Við erum, að mínu viti, ekki viðkvæmari fyrir árásum en önnur lönd en sjálfsagt geta komið upp atvik hér eins og annars staðar. Hættan er fyrir hendi og og við verðum að hafa viðbúnað til að bregðast við því sem að höndum ber.“

Samkvæmt heimildum Fréttablaðsins hefur stefnumótunarferlið tekið nokkuð lengri tíma en upphaflega var ætlast til. Hins vegar standi það til bóta og vinna fari á fullt með vorinu, en henni verður þó varla lokið fyrr en á næsta ári.

Ekki náðist í Ögmund Jónasson innanríkisráðherra við vinnslu fréttarinnar.