Engin alvarleg slys en mikið eignatjón

Engin alvarleg slys urðu á fólki í árekstrinum á Hafnarfjarðarveginum í morgun. Það er þó ljóst að eignartjón er gríðarlega mikið.

15 til 20 bílar lentu í árekstri nærri Kópavogslæknum á Hafnarfjarðarveginum skömmu fyrir klukkan hálf ellefu í morgun.

Samkvæmt upplýsingum frá slökkviliðinu voru nokkrir sjúkrabílar sendir á vettvang og voru farþegar og ökumenn færðir á spítala til aðhlynningar.

Ekki var þó hægt að fá nákvæma tölu yfir það hversu margir voru fluttir á spítala. Það skal þó taka fram að enginn reyndist alvarlega slasaður.

Varðstjóri hjá lögreglunni í Kópavogi segir í samtali við Vísi að það sé ljóst að eignatjón sé mikið.

Nú er unnið að því að færa bílana að vegriðinu svo það sé hægt að opna eina akrein. Svo stendur til að kranabifreiðar fjarlægi bílana. Enn skal árétta að það er ekkert ferðaveður. Það er erfitt að komast á milli staða.

„Fólk á ekki að fara út nema það sé spurning um líf og dauða. Og þá þarf fólk samt að huga að því hvernig það ætli að komast á leiðarenda," segir varðstjóri lögreglunnar.