Hætta talin á olíumengun

Umhverfisstofnun hefur virkjað viðbragðsáætlun og er vettvangsstjóri á leið á staðinn þar sem skip strandaði við Skoreyjar á Breiðafirði í morgun.

„Skipið liggur utan í skeri við Skoreyjar og það liggur á bakborðshlið og það er olía í tönkum þeim megin, við erum náttúrulega að tala um Breiðafjörðinn með sínu viðkvæma lífríki þannig að við sáum ástæðu til þess að fara á staðinn og ræsa kerfið til að vera til staðar og skoða aðstæður ef á þarf að halda," segir Kristján Geirsson, teymisstjóri á náttúrusviði hjá Umhverfisstofnun.

Talið er að hætta sé á olíumengun frá skipinu. Bráðamengunarbúnaður verður sendur á svæðið til notkunar ef þörf krefur.

Svæðið á Breiðafirði er viðkvæmt og því nauðsynlegt að reyna að tryggja að sem minnst áhrif verði á lífríkið.