Gefa stjórnvöldum gula spjaldið

Stjórn Hagsmunasamtaka heimilanna réttir stjórnvöldum gula spjaldið í fréttatilkynningu sem þau sendu frá sér rétt í þessu. Samtökin minna á kosningaloforð varðandi skuldavanda heimilanna og benda á mikilvægi þess að stjórnvöld hafi hraðar hendur og krefjast þess að málið fari í framkvæmd strax nú á sumarþingi.

Í upphafi sumarþings sendu Hagsmunasamtölin nýjum stórnvöldum áskorun og áminningu um að stöðva tafarlaust nauðungarsölur, gjaldþrot og sölur á veðhafafundnum eignum meðan beðið er  dóma um lögmæti lánasamninga. Einnig er mælst til að sett yrðu ný endurupptökulög sem myndu gagnast þeim sem gerðir hafa verið gerðir gjaldþrota þannig þeir geti fengið heimili sín aftur til baka frá lánastofnunum sem náðu þeim á nafn sitt með ólögmætum hætti.

Samtök heimilanna segja þingsályktunartillögu forsætisráðherra um aðgerir og skuldavanda heimila á Íslandi engan veginn fullnægjandi sem lausn fyrir heimili og fjölskyldur sem beðið hafa í fjögur ár eftir lausnum. Margir séu við það að missa endanlega vonina.

Samtökin hafa sent inn ítarlega umsögn  um þingsályktunartillöguna. Þar kemur fram að þó að tillögurnar séu um margt ágætar vanti töluvert upp á. Í tilkynningunni kemur fram að ef ekkert verður gert til að bæta úr tillögunum munu samtökin sjá sig knúin til að grípa til aðgeðra. Fjölskyldur landsins geti ekki þolað annan vetur í óvissu og án vonar.