Íslendingar gera sig gilda á Norðurslóðum

„Ísland þarf að leggja áherslu á að vera í fararbroddi í norðurslóðasamstarfi, með tilliti til nýtingar auðlinda á svæðinu, umhverfisverndar og opnunar nýrra siglingaleiða um norðurhöf."

Þetta var meðal þess sem Sigmundur Davíð Gunnlaugsson forsætisráðherra sagði í stefnuræðu sinni á Alþingi í gærkvöldi og bætti við að mikilvægt væri að hefja strax vinnu við að fá til Íslands verkefni tengd hinni hröðu þróun í þessum heimshluta.

Með þessari stefnumörkun viðheldur ný ríkisstjórn þeim áherslum sem fyrrverandi ríkisstjórn lagði á samstarfið á norðurslóðum undir forystu Össurar Skarphéðinssonar utanríkisráðherra sem sagði Norðurskautsráðið eina vettvanginn þar sem Íslendingum gæfist færi á að vinna náið með helstu stórveldum heims á jafningjagrundvelli.

Sigmundur Davíð hefur þegar stigið sín fyrstu skref á þessum vettvangi þegar hann sótti leiðtogafund Barentsráðsins í Kirkenes í Norður-Noregi í síðustu viku. Aðildarríki Barentsráðsins eru Noregur, Rússland, Svíþjóð, Finnland, Danmörk og Ísland, auk þess sem Evrópusambandið á aðild að ráðinu.

Sigmundur Davíð fundaði sérstaklega með Dmitry Medvedev, forsætisráðherra Rússlands og átti einnig tvíhliða fundi með Jens Stoltenberg, forsætisráðherra Noregs, og Jyrki Katainen, forsætisráðherra Finnlands, sem og Carl Bildt, utanríkisráðherra Svíþjóðar.

Í yfirlýsingu leiðtogafundar Barentsráðsins koma meðal annars fram áherslur sem varða norð-austur siglingaleiðina, endurnýjanlega orkugjafa og mikilvægi þróunar á svæðinu, bæði hvað varðar samgöngur, innviði og mannauð, að því er fram kemur í frétt frá forsætisráðuneytinu.