Flytja út 130 þúsund roð

Fyrirtækið Sjávarleður á Sauðárkróki seldi tískuvörur sem unnar voru úr um 130 þúsund fiskroðum úr landi í fyrra.

Það er löngu liðin tíð að litið sé á fiskroð sem verðlausan úrgang. Fyrirtækið hefur nýtt það í mörg ár við sína tískuhönnun, þar á meðal í handtöskur, skó og annan fatnað.

Helstu markaðirnir fyrir roðvörur eru í sunnanverðri Evrópu og í Bandaríkjunum, segir Gunnsteinn Björnsson, framkvæmdastjóri Sjávarleðurs. Hann stýrir einnig fyrirtækinu Loðskinni, sem sérhæfir sig í vinnslu á gærum. Þrjátíu og fimm manns vinna hjá fyrirtækjunum tveimur.