Sjómaðurinn illa haldinn

„Maðurinn er nú á Landspítalanum og talsvert illa haldinn með slæma bakáverka,“ sagði Auðunn F. Kristinsson frá Landhelgisgæslunni í samtali við Fréttablaðið í dag.

Íslenskur sjómaður slasaðist um borð í hafrannsóknarskipinu Árna Friðrikssyni, sem var á siglingu austan við landið. Sjómaðurinn var að vinna á dekki þegar hann slasaðist.

Þyrlur Landhelgisgæslu Íslands voru kallaðar út um klukkan hálfátta í gærmorgun og flutti ein þyrlan sjómanninn til Egilsstaða þar sem sjúkraflugvél tók við honum og flutti hann til Reykjavíkur.

Maðurinn lenti ekki í Reykjavík fyrr en sex tímum eftir að aðstoð barst frá skipinu, þar sem skipið var talsvert langt frá landi er slysið varð.