Miklar vangaveltur um varaformennsku

Vinstrihreyfingin – grænt framboð mun ganga til kosninga með nýja forystu. Steingrímur J. Sigfússon, formaður flokksins, tilkynnti um það á laugardag að hann hygðist ekki gefa kost á sér til endurkjörs og Katrín Jakobsdóttir, varaformaðurinn, lýsti því yfir í gær að hún sæktist eftir formennskunni. Fátt getur komið í veg fyrir að Katrín verði formaður flokksins. Hún hefur gegnt varaformennsku síðan árið 2003 og verið nokkuð óumdeildur arftaki Steingríms. Helst hefur Svandís Svavarsdóttir verið nefnd sem mögulegur keppinautur Katrínar en hún sagði í fjölmiðlum í gær að hún hygðist hvorki bjóða sig fram til formanns né varaformanns. Ögmundur Jónasson innanríkisráðherra er staddur á Indlandi. Hann segir eðlilegt að menn fái tækifæri til að viðra óskir sínar á næstu dögum varðandi forystu í flokknum. Hvað hann varðar segir hann: „Frá stofnun flokksins hef ég aldrei íhugað að bjóða mig fram til formennsku, þrátt fyrir ítrekaðar vangaveltur þar að lútandi.“ Fréttablaðið hefur heimildir fyrir því að miklar hræringar séu farnar af stað í þá átt að Björn Valur Gíslason verði varaformaður. Hann er þingmaður flokksins í Norðausturkjördæmi en gaf kost á sér í efsta sæti listans í forvalinu í Reykjavík. Þar endaði hann í 6. sæti. Björn Valur vildi ekki segja af eða á um framboð sitt þegar Fréttablaðið ræddi við hann. „Ég hef fengið hvatningu og áskoranir frá fólki sem ég tek mark á varðandi varaformennskuna en vil að öðru leyti ekki tjá mig um það í bili.“ Heimildir Fréttablaðsins herma að um nokkurt skeið hafi staðið yfir hreyfingar um að koma Birni Val ofar á framboðslistann í Reykjavík. Þeim er ekki lokið en dregist hefur að kynna lista flokksins í kjördæmunum tveimur. Árni Þór Sigurðsson hefur einnig verið nefndur til sögunnar. Það þykir vinna gegn honum að hann kemur einnig úr Reykjavík, var með Katrínu í borgarpólitíkinni. Þá er einnig horft til yngri kandídata og hefur nafn Edwards Huijbens verið nefnt til sögunnar. Hann skipar þriðja sæti framboðslistans í Norðausturkjördæmi. Edward var nýlentur í Leifsstöð þegar Fréttablaðið ræddi við hann í gær og sagðist ekkert hafa velt slíkum hlutum fyrir sér.