Árni Þór: Bagalegt ef menn ganga á lagið strax

„Það er alveg ljóst að tilgangur laganna er að koma til móts við skemmtiferðaskip sem sigla í kringum landið," segir Árni Þór Sigurðsson, þingmaður Vinstri grænna, en hann kom í gegn breytingum á tollalögum á síðasta ári sem gerði skemmtiferðaskipum, skráðum í útlöndum, kleift að gera út tollfrjálst hér við land í allt að fjóra mánuði á ári.

Ferðafyrirtækið Iceland Excursion segir í tilkynningu að tvö erlend fyrirtæki, sem gera út skemmtiferðaskip, hafi óskað eftir samstarfi við ferðaþjónustufyrirtækið. Hugmynd útgerðarfyrirtækjanna er að bjóða Íslendingum jafnt sem útlendingum upp á tollfrjálsar siglingar í kringum landið.

Þetta myndi þýða að Íslendingar gætu siglt í kringum landið, spila í spilavítum skipanna og keypt tollfrjálsar vörur. Svo eru einnig næturklúbbar á þessum skipum. Íslensk lög myndu ekki ná yfir spilavítin, sem eru ólögleg hér á landi, eða næturklúbbana, en ströng lög gilda um skemmtanahald hér á landi.

Árni Þór segir að ef einhverjir ætli sér að fara gegn anda laganna, og nýta sér þá með óeðlilegum hætti, þá þurfi að skoða það sérstaklega. „Tilgangurinn er ekki sá að þeir geti lagt við bryggju sumarlangt og verið í samkeppni við starfsemi í landi," segir Árni Þór sem áréttar þó að hann hafi ekki kynnt sér hugmyndir fyrirtækisins til fulls.

Hann segir að það hafi þó komið ábending frá tollstjóra á sínum tíma varðandi þetta, svo sem með spilavítin. „Tollstjóranum var þá falið að setja nánari reglur um þetta," segir Árni Þór sem veit þó ekki hvernig þeirri vinnu lyktaði.

„En ef menn telja að það sé verið að fara út fyrir það sem hugsað var um í lögunum, eða þetta skekki samkeppnisstöðuna, þá verður að fara yfir það á nýjan leik," segir Árni Þór og bætir við: „Og það er bagalegt ef menn ganga á lagið strax."