Karl Vignir gisti fangageymslur í nótt

Það ræðst síðar í dag hvort lögregla krefst gæsluvarðhalds yfir barnaníðingnum Karli Vigni Þorsteinssyni. Skýrslutöku yfir honum er nú lokið í bili að sögn yfirmanns kynferðisbrotadeildar lögreglunnar. Karl Vignir gisti fangageymslur lögreglunnar í nótt og er hann nú enn hjá lögreglu.

Karl Vignir játaði að hafa misnotað allt að fimmtíu börn í gegnum tíðina á upptökum sem Kastljós sýndi í fyrrakvöld. Hann var í kjölfarið kallaður til skýrslutöku hjá lögreglu og beðinn um að gefa nánari upplýsingar um brotin og brotaþola.

„Karl Vignir hefur verið í skýrslutöku í gær og var í skýrslutöku fram á kvöld og aftur í morgun. Skýrslutökum er lokið í bili og það er verið að íhuga næstu skref hér hjá okkur. Og hann dvelur hjá ykkur núna? Já, hann er hjá okkur. Verður hann það áfram? Já, hann verður áfram þar til ákvörðun verður tekin hvort að lögð verður fram gæsluvarðhaldskrafa sem er þá síðar í dag. Ég get svo sem ekki mikið sagt meira um það," segir segir Björgvin Björgvinsson yfirmaður kynferðisbrotadeildar lögreglu og bætir við að ekki sé hægt að gefa nánari upplýsingar um skýrslutökuna yfir Karli Vigni að svo stöddu.

Ítarlega var fjallað um Karl Vigni í DV árið 2007 eftir að hann játaði kynferðisbrot gegn þremur drengjum á vistheimilinu að Kumbaravogi. Fjöldi greina var birtur, bæði með viðtölum við fórnarlömb og aðstandendur þeirra, en þar sem brotin voru fyrnd gat lögregla ekkert aðhafst.

Á upptökunum í Kastljósi játaði hann að hafa brotið gegn börnum á síðustu árum, eftir 2007, en það ár var lögunum breytt þannig að alvarlegustu kynferðisbrotin gegn börnum fyrnast ekki.

Síminn stoppaði varla hjá Stígamótum í gærdag, í kjölfar umfjöllunar Kastljóss. Guðrún Jónsdóttir talskona Stígamóta segir að sama hafi verið upp á teningnum í gærkvöldi og í morgun en einnig lögðu allmargir inn skilaboð á símsvara samtakanna í nótt. Fólk hefur leitað til Stígamóta vegna ofbeldis sem það segir Karl hafa beitt sig en einnig hafa aðrir leitað sér hjálpar vegna ofbeldis sem það hefur verið beitt af öðrum.