Lífshættulegt að leyfa börnum að hlaupa meðfram bílum

Það er mjög hættulegt þegar vegfarendur ganga eða hlaupa meðfram ökutækjum sem eru á hreyfingu. Sérstaklega þarf að gæta varúðar þegar börn eiga í hlut. Ökumenn geta hæglega misst sjónar af börnum vegna smæðar þeirra. Þetta kemur fram í varnaðarorðum Rannsóknarnefndar umferðarslysa sem lauk nýverið rannsókn fimm banaslysa í umferðinni sem urðu árið 2011.

Í ágúst í fyrra varð slys á heimreiðinni að bænum Mið-Seli í Rangárvallasýslu. Ökumaður fólksbifreiðar ók að heimreiðinni en stöðvaði við hlið sem þar er. Í bifreiðinni voru þrjú börn ásamt ökumanni og hugðust tvö þeirra hlaupa eftir heimreiðinni að húsi sem þau dvöldu í. Annað barnið, ung telpa, var við hlið bílsins þegar ökumaður ók af stað og varð undir honum. Að mati RNU gætti ökumaður ekki að því að telpan var í mikilli hættu vegna nálægðar sinnar við bifreiðina.

Annað slys, þessu líkt, varð árið 2002 á tjaldsvæði þar sem ung telpa fórst. Vegna þessara atvika vill nefndin brýna fyrir foreldrum og forráðamönnum barna að sýna aðgæslu og hafa öryggið í fyrirrúmi.

Umfjöllun Rannsóknarnefndar umferðarslysa