Krossviður Jónasar rifinn af veggjunum

Endurbætur á innviðum Menntaskólans í Reykjavík halda áfram í sumar. Leitast er við að endurheimta upprunalegan frágang hússins. Til þess er fjarlægður krossviður af veggjum sem á sér rætur í endurbótum Jónasar frá Hriflu um 1930.

Þessa dagana er unnið að viðhaldi innanstokks í Menntaskólanum í Reykjavík. Markmið framkvæmdanna er að færa innri frágang skólans eins nálægt uppruna sínum og kostur er á og að bæta tæknilegt ástand hússins, bæði með tilliti til notkunar og öryggisatriða. Það má hins vegar vart færa til einn gólflista án þess að saga þessa einstaka húss komi upp í hugann.

Stefán Örn Stefánsson hjá arkitektastofunni Argos, sem mótaði tillögur að viðgerðum og endurbótum skólans, segir það ekki einfalt verk að endurgera innviði skólans. „Krossviðurinn er tekinn niður og veggirnir kalkmúraðir upp á nýtt eins og var. Upphaflega múrverkið var allt farið að springa á sinum tíma og plöturnar því settar upp.“

Hús Menntaskólans er stokkahlaðið bjálkahús og mjög stórt sem slíkt. Það er meðal merkustu bygginga landsins frá fyrri tíð og eitt fyrsta tvílyfta húsið sem reist var í Reykjavík. Þá er húsið elsta skólahús landsins sem uppi stendur í óbreyttri mynd, reist samkvæmt konunglegri tilskipun frá 7. júní 1841 eða þegar ákveðið var að flytja lærða skólann frá Bessastöðum til Reykjavíkur. Og það er kunnara en frá þurfi að segja að í húsinu hefur sama stofnunin – Reykjavíkurskóli – verið til húsa óslitið frá upphafi, eða frá 1. október 1846 þegar skólahald hófst.

Handverkið sem þarf til viðgerðanna er ekki allra. Því koma að verkinu þrír völundar eða þeir Gunnar Bjarnason trésmiður, sem er einn fárra sem kann til verka við hús sem þetta, Bragi Guðjónsson sér um múrverkið og Helgi Grétar Kristinsson sem blandar límfarvann og olíuna sem fer á timbrið; hvort tveggja í anda málningarefna frá fyrri tíð.

Rektor Menntaskólans, Pálmi Hannesson, ritaði grein í Tímann 1. maí 1935 þar sem hann víkur að endurbótum skólans árin 1928 til 1930. Í grein hans kemur fram að Jónas frá Hriflu hafi staðið fyrir endurbótunum, sem vakti nokkra furðu því seint hefði Jónas verið talinn sérstakur vinur þeirra sem þar sátu á skólabekk. Þar lýsir rektor hinum „gljáða krossvið“ sem gangar og stofur skólans voru lagðar, en er fyrst núna fjarlægður.svavar@frettabladid.is