Dómari segir Börk hafa verið ógnandi

„Hann var mjög ógnandi," sagði Sandra Baldvinsdóttir héraðsdómari við Héraðsdóm Reykjaness um Börk Birgisson. Aðalmeðferð fer fram í Héraðsdómi Reykjavíkur í dag yfir Berki, sem sakaður er um að hafa brotið gegn valdstjórninni þegar hann hrækti á Söndru í vor. Þá var verið að úrskurða að Börkur skyldi sitja af sér eldri dóm eftir að hann hafði, á reynslulausn, verið sakaður um fjölda ofbeldisbrota.

Sandra, sem gaf skýrslu í gegnum síma, segir að Börkur hafi hrækt á sig og hóstað út úr sér orðunum tussa í tvígang. Orðunum hafi verið beint gegn sér og engum öðrum. „Þú ert nú meiri lygarinn," sagði Börkur þá en hann gengst við því að hafa sagt „tussa" í dómsalnum en neitar því að þeim orðum hafi verið beint gegn dómaranum.

Sandra sagði að Börkur hefði verði mjög ógnandi, ekki beint í orðalagi heldur í líkamstjáningu.

Fréttamaður fréttastofu Stöðvar 2 og Vísis er á staðnum og við segjum ítarlegar fréttir af þessu á Vísi og í kvöldfréttum Stöðvar 2 í dag.