Krefst sex mánaða fangelsis yfir Berki

Sækjandi í málinu gegn Berki Birgissyni fer fram á sex mánaða fangelsi fyrir að hafa hrækt á dómara og kallað ókvæðisorðum. Aðalmeðferð í málinu fór fram í morgun og var gríðarleg öryggisgæsla í dómnum.

Börkur gekkst í morgun við því að hafa hrækt á skikkju Söndru Baldvinsdóttur dómara í vor. Hann segist jafnframt hafa kallað „tussa" en þeim orðum hafi ekki verið beint að henni. Eins og fréttastofa greindi frá í morgun bar Sandra vitni í málinu í gegnum síma en hún er stödd erlendis. Hún segir að ekki verði um villst að orðunum hafi verið beint gegn henni. Hún segir að Börkur hafi verið ógnandi í dómssal.

Gríðarleg öryggisgæsla hefur verið í Héraðsdómi Reykjavíkur í morgun vegna réttarhaldanna. Ekki síst eftir að ókunnur maður í annarlegu ástandi réðst að lögreglumönnum og hugðist færa Berki úlpu við upphaf réttarhaldanna.

Málið gegn Berki var upphaflega rekið fyrir Héraðsdómi Reykjaness en vegna hegðunar hans gegn Söndru dómara lýstu allir dómarar í Héraðsdómi Reykjaness sig vanhæfan til að fjalla um það og var því ákveðið að það skyldi fá meðferð í Héraðsdómi Reykjavíkur.

Auk ákæru um brot gegn valdstjórninni með því að hafa hrækt á dómara og kallað ókvæðisorðum að henni, er Börkur ákærður fyrir fjölmörg ofbeldisbrot ásamt Annþóri Kristjáni Karlssyni og fleirum. Börkur og Annþór eru að auki grunaðir um að hafa banað samfanga sínum á Litla Hrauni.

Aðalmeðferðinni lauk nú klukkan tólf og verður dómur kveðinn upp í næstu viku.

Ítarleg umfjöllun um réttarhöldin yfir Berki verður í kvöldfréttum Stöðvar 2 í kvöld.