Úlpumaðurinn verður ákærður

Ekkert var í úlpunni sem maður reyndi að koma í hendur Barkar Birgissonar í Héraðsdómi Reykjavíkur í morgun. Maðurinn lenti að auki í minniháttar átökum við lögregluna þegar hann hlýddi ekki fyrirmælum.

Það var í morgun sem lögreglan ætlaði að færa Börk fyrir dómara vegna ákæru um brot gegn valdstjórn þar sem hann á að hafa kallað dómara illum nöfnum auk þess sem hann hrækti á skikkju hennar.

Þegar lögreglan kom með hann í húsið kom aðvífandi karlmaður sem hugðist rétta Berki úlpu. Lögreglan kom í veg fyrir það en maðurinn veðraðist þá allur upp og lenti í átökum við lögregluna. Hann var þá yfirbugaður og svo handtekinn.

Samkvæmt upplýsingum frá lögreglunni á höfuðborgarsvæðinu var ekkert ólögmætt í úlpunni og ekki ljóst hvað manninum gekk til, en hann er í annarlegu ástandi og er enn að sofa úr sér vímuna.

Málið er litið afar alvarlegum augum og verður ekki lokið með sektargreiðslum. Þannig verður hann líklegast ákærður fyrir brot gegn valdstjórn, líkt og félagi hans Börkur, auk þess sem hann verður meðal annars ákærður fyrir að hafa brotið gegn lögreglusamþykktum þar sem hann hlýddi ekki fyrirmælum lögreglu.

Börkur er að auki ákærður fyrir fjölmörg brot, þar á meðal fyrir ofbeldi, kúgun og fleira. Þá er félagi hans, Annþór Kristján Karlsson einnig ákærður fyrir sömu brot.