Kemur vampíruleikurinn út árið 2014?

Vísbendingar eru um að þriðji leikur CCP, World of Darkness, komi út árið 2014. Í frétt í Viðskiptablaðinu í gær er vitnað í ársskýrslu fyrirtækisins. Þar er farið yfir þróunaráætlun en í henni er gert ráð fyrir því að leikurinn verði tilbúinn til framleiðslu í ár og hann verði gefinn út árið 2014.

CCP hefur ekki gefið upp hvenær leikurinn kemur út. Í samtali við fréttastofu vill Eldar Ástþórsson, fjölmiðlafulltrúi CCP, ekkert gefa út. Enn hvíli leynd yfir því hvenær fyrirhuguð útgáfa verður.

CCP hefur í nógu að snúast um þessar mundir því fyrirtækið er nú að reyna að tryggja árangursríka útgáfu á DUST 514 tölvuleiknum, sem hefur hlotið mikið lof frá starfsmönnum tölvuleikjaiðnaðarins. Kynningarstarfsemin fer fram í samstarfi við SONY og segir Eldar óneitanlega öflugt tækifæri að fá að vinna með svo stóru fyrirtæki. Um leið vinnur fyrirtækið að því að tryggja áframhaldandi velgengni EVE. Sú vinna gengur mjög vel að sögn Eldars.

World of Darkness verður svo þriðji leikur fyrirtækisins. Hann verður fjölspilunarleikur fyrir PC eins og EVE Online, en sögusviðið er allt annað. Vampírur í stórborg, en ekki geimskip í fjarlægum himingeimi. Framleiðslan er í fullu gangi, að mestu leyti hjá teymum CCP erlendis.

CCP hefur gefið út að notendur muni byrja sem dauðlegir menn sem geta valið um að verða vampírur eða vera áfram mannlegir. Það verður raunverulegur möguleiki á því að persóna spilaranna deyi endanlega ef þeir taka of mikla áhættu. Þá verða menn að byrja leikinn upp á nýtt, en þetta er í samræmi við EVE tölvuleikinn þar sem spilarar geta misst geimskipin sem þeir stýra ef þeir eru drepnir.

Kynningarmyndband fyrir tölvuleikinn má sjá með því að smella á tengilinn hér að ofan.