Guzman til Swansea | Fyrrum lærisveinum Laudrup fjölgar

Jonathan de Guzman hefur skrifað undir eins árs lánssamning við enska úrvalsdeildarfélagið Swansea. Guzman er samningsbundinn Villarreal í efstu deild spænska boltans.

Guzman hittir fyrir Michael Laudrup fyrrum stjóra sinn hjá Mallorca á Spáni sem tók við stjórninni hjá Swansea í upphafi sumars.

Guzman er sóknarsinnaður miðjumaður sem spilaði yfir 100 leiki með aðalliði Feyenoord í Hollandi. Þaðan fór hann frjálsri sölu til Mallorca árið 2010 áður en hann var seldur til Villarreal á sjö milljónir punda í ágúst á síðasta ári.

Tækifæri Guzman hjá Villarreal voru af skornum skammti á síðustu leiktíð. Í viðtali á heimasíðu Swanea segist Guzman fyrst og fremst vilja spila reglulega og segir Swansea hafa vakið hjá sér athygli á síðustu leiktíð þegar liðið vann sigur á Manchester City. Swansea hefur kauprétt á Guzman að loknum lánstímanum.

Fyrr í dag var tilkynnt að Swansea hefði gengið frá kaupum á miðverðinum Chico Flores frá ítalska félaginu Genoa. Flores lék einnig undir stjórn Laudrup hjá Mallorca.

Swansea sækir QPR heim í fyrstu umferð ensku úrvalsdeildarinnar 18. ágúst.