Síbreytilegt Hyldýpi

Hópurinn Sublimi frumsýnir sviðsverkið Hyldýpi eftir Ragnheiði Hörpu Leifsdóttur í Gamla bíó á föstudag. Verkið er síbreytilegt og lagar sig að aðstæðum.

Ragnheiður Harpa Leifsdóttir útskrifaðist af fræða- og framkvæmdasviði Listaháskóla Íslands vorið 2011. Útskriftarverkefni hennar, Dagksrá um eldingar, vakti athygli erlendra hátíðarhaldara þegar það var sýnd á sviðslistahátíðinni LÓKAL sama ár, og báðu hana að semja nýtt verk. Afraksturinn er Hyldýpi, sem frumsýnt verður í Petersen svítunni í Gamla Bíó á föstudag, en áður hefur verkið verið sýnt í Danmörku og á sviðslistahátíðinni Baltic Circle í Helsinki.

Hún lýsir sýningunni sem sjónrænu ljóði og kveðst hafa fengið hugmyndina frá ömmu sinni. "Hún býr til dagskrá um hugðarefni sín, til dæmis sagnakvöld um kvenpersónur þar sem hún býður vinum og fjölskyldu inn í stofu og flytur dagskrána sem samanstendur af söng, texta og ljóðum."

Sýningin er byggð upp á svipaðan hátt og Dagskrá um eldingar en Ragnheiður Harpa segist hafa heillast af einfaldleika formsins og viljað þróa það lengra og "fara lengra út í myrkrið". Þaðan er titill sýningarinnar sprottinn.

"Hann hefur ýmsar tengingar," segir Ragnheiður Harpa, "getur vísað til hyldýpis sjávarins eða hyldýpis sálarinnar, þar sem enginn veit hvað kann að leynast. Við spilum dálítið vísvitandi inn á þetta og þess vegna er sýningin síbreytileg, lokaatriðið er til dæmis aldrei eins því hver áhorfandi upplifir í raun sína eigin sýningu."

Rýmið leikur líka hlutverk og segir Ragnheiður ólíkt að leika í tiltölulega stórum samkomulag eins og í Finnlandi, þar sem margir áhorfendur komast fyrir, og litlu rými á borð við Petersen svítuna.

"Hún er eiginlega fullkomin staður fyrir þetta verk, því það skapast svo mikil nánd." Hyldýpi verður sýnt fjórum sinnum í Gamla bíó, á föstudag, sunnudag, mánudag og þriðjudag, og verður sýnt á Akureyri í janúar."