Brotið og bramlað hjá listamönnum

Brotist var inn á Korpúlfsstaði í annað skiptið á nokkrum mánuðum. Lítil verðmæti eru geymd þar en miklar skemmdir voru unnar á vinnustofum listamanna. Erfitt er fyrir listamennina að verjast, segir Sigurður Valur Sigurðsson.

„Við erum í losti, það er búið að brjótast inn um allar hurðir. Skemmdarvargar ganga um eyðileggjandi, brjótandi, rífandi og tætandi,“ segir Sigurður Valur Sigurðsson listamaður, sem er með vinnustofu á Korpúlfsstöðum. Þar var brotist inn um helgina, í annað skiptið á nokkrum mánuðum.

Hengilásar voru brotnir upp og klifrað yfir mjög háa veggi í innbrotinu, sem varð sennilega aðfaranótt mánudags. Málið er í rannsókn.

„Við erum í miðju kafi að undirbúa opið hús sem við ætluðum að hafa undir lok mánaðarins og þetta er náttúrulega algjör viðbjóður, að lenda í þessu. Þeir hafa ekki haft neitt upp úr krafsinu, sem betur fer skilur enginn eftir neinn dýran tölvubúnað eða neitt slíkt hérna,“ segir Sigurður Valur. Hann segir að þó litlu hafi verið stolið hafi margt verið eyðilagt.

„Það er verið að brjóta og bramla og skemma fyrir okkur dót. Það var vaðið hér í gegnum alla hluti og svo eru listamenn hérna sem sjá að menn hafa verið að henda málverkum fram og til baka, eins og einhver hafi bara verið að velja sér málverk. Þá var búið að taka málningartúpur og pensla, sem er dýr búnaður en gagnast engum nema listamönnunum.“

Fyrir nokkrum mánuðum var rúða í húsinu brotin og farið var inn um hana. Þá var glerlistaverkum og öðru stolið auk þess sem skemmdarverk voru unnin. „Við höfum orðið fyrir ýmsum áföllum hérna. Fyrir nokkrum árum varð rosalegt flóð og allir sem voru með vinnustofu í kjallaranum misstu allt sitt.

Svo erum við að fá þetta yfir okkur núna. Húsið er líka verndað, það er einfalt gler og við megum ekki setja sterkara gler. Það er erfitt fyrir okkur að verjast þessu, þótt það sé sáralítið sem hægt er að hafa hérna inni.“ thorunn@frettabladid.is