173 atkvæði ranglega úrskurðuð ógild

Ósamræmi er í matsreglum kjörstjórna í kjördæmunum sex og misjafnt hvenær atkvæði eru úrskurðuð ógild. Landskjörstjórn segir 173 kjörseðla, sem dæmdir voru ógildir í þjóðaratkvæðagreiðslunni um stjórnarskrá, hafa verið gilda.

173 atkvæði sem dæmd voru ógild í þjóðaratkvæðagreiðslunni um stjórnarskrá 20. október síðastliðinn voru í raun gild. Þetta er mat landskjörstjórnar, en umboðsmenn kjósenda í Reykjavíkurkjördæmi norður óskuðu eftir því að úrskurðað yrði um gildi kjörseðlanna.

„Á 127 kjörseðlum gerir kjósandi leiðréttingu á svari sínu við einni spurningu eða fleiri og atkvæðaseðillinn er metinn ógildur í heild af yfirkjörstjórn í Reykjavíkurkjördæmi norður,“ segir í bókun þeirra Ásdísar J. Rafnar lögfræðings og Huldu R. Rúriksdóttur hæstaréttarlögmanns, sem voru umboðsmenn kjósenda í kjördæminu. Á hinum 52 kjörseðlunum höfðu ein eða fleiri spurningar verið ógiltar með öðrum hætti.

Landskjörstjórn hefur í þjóðaratkvæðagreiðslum skipað umboðsmenn fyrir þá kjósendur sem segja já annars vegar og nei hins vegar í hverju kjördæmi.

Ásdís og Hulda bentu á að samkvæmt lögum um kosningar til Alþingis eigi ekki að úrskurða atkvæði ógilt ef greinilegt er hvernig það eigi að falla. Þá töldu þær að meta ætti svörin við hverri og einni spurningu eins og um sérstakan kjörseðil væri að ræða.

Þessu er landskjörstjórn sammála. Hins vegar voru sex kjörseðlar þannig að merki eða orð höfðu verið sett við einhverjar spurningar og það taldi landskjörstjórn brjóta í bága við lög. Því ættu þau sex atkvæði að vera ógild í heild sinni. thorunn@frettabladid.is