Android í skotlínunni

„Android er í sömu stöðu og Windows var í hér áður fyrr,“ segir Rik Ferguson, yfirmaður þróunar, rannsókna og samskipta hjá tölvuöryggisfyrirtækinu TrendMicro í Evrópu. Þessi staða geri stýrikerfið, sem er það vinsælasta í heimi fyrir snjallsíma, spjaldtölvur og margvísleg önnur tæki, að helsta skotmarki tölvuglæpamanna.

„Þeir sömu og áður stóðu fyrir árásum á tölvur sjá nú hagnaðarvon í að herja á snjallsíma. Hér eru engir aukvisar á ferð,“ segir Ferguson, sem hélt erindi á „föstudagshugvekju“ Advania í gærmorgun.

Óværan er svo af ýmsum toga. Sum forrit láta símann hringja eða senda skilaboð sem svo er rukkað hátt gjald fyrir, önnur stela gögnum og svo eru forrit sem láta símann „smella“ á auglýsingatengla þar sem eigendur þeirra fá greitt fyrir hvern smell.

Á ráðstefnunni sýndi Ferguson líka hvernig fjarstýra mátti Android-farsíma sýktum af óværu og fylgjast með símtölum og SMS-sendingum, auk þess að láta hann taka upp það sem gerðist í kringum hann, allt án þess að notandinn yrði þess var.

Helstu vörnina segir Ferguson að halda vöku sinni. Símar sýkist helst af óværu sem laumað er með öðrum hugbúnaði eða leikjum. Þá átti sig margir ekki á því að símar geti sýkst af því einu að smella á flýtivísun í tölvupósti eða SMS-skilaboðum.

Þeir sem óttast sérstaklega að vera skotmörk óvandaðra tölvuglæpamanna ættu svo líka að velja símtæki með öruggara stýrikerfi en Android, segir Ferguson. Tölvuógnir fyrir farsíma séu hins vegar veruleiki sem bregðast verði við.

olikr@frettabladid.is