Systraverk innblásin af Sigur Rós

Lilja og Ingibjörg Birgisdætur sýna listaverk innblásin af plötu Sigur Rósar, Valtari, á sýningunni Varúð sem haldin er í tengslum við Airwaves 2012. „Hafið leikur stórt hlutverk á Varúð,“ segir Lilja Birgisdóttir sem verður fyrir svörum, „enda sveipað dulúð og fegurð líkt og tónlist Valtara.“

Lilja og Ingibjörg gerðu plötuumslag Valtara. Verkin á sýningunni tengjast þó fæst plötunni beint, nema þó þannig að platan varð innblástur verkanna. „Á sýningunni eru handlitaðar ljósmyndir, vídeó- og hljóðverk. Sem dæmi um það síðastnefnda er verkið sem sýningin dregur nafn sitt af, Varúð, en það byggir á skipaflauti. Þegar blásnir eru fimm langir tónar þá þýðir það varúð.“

Lilja segir sýninguna því nokkurs konar samruna tónlistar og myndlistar. „Það er mjög áhugavert að velta þessum samruna listheima fyrir sér. Tónlist er huglæg í sjálfri sér og óáþreifanleg og með verkunum má segja að við sýnum áþreifanlega túlkun á tónlistinni og sköpum henni ákveðna efniskennd.“

Lilja og Ingibjörg eru systur sem báðar hafa fetað veg myndlistarinnar. Þær útskrifuðust báðar úr myndlistardeild Listaháskóla Íslands. Þær eru systur Jónsa, söngvara Sigur Rósar. „Við unnum líka saman að plötuumslaginu og öllum listrænum verkefnum á plötunni hans, Go. Við erum mjög samrýndar enda bara tvö ár á milli okkar,“ segir Lilja að lokum. 

Sýningin verður opnuð í kvöld í Listamenn gallerí, Skúlagötu 32. Opnunin er á milli sex og átta í kvöld og eru allir hjartanlega velkomnir.