Íbúar telja breitt yfir neikvæð áhrif spítala

Íbúasamtök 3. hverfis, sem nær til Hlíða, Holta og Norðurmýri, segja umhverfismat á deiliskipulagstillögu um nýjan Landspítala við Hringbraut vera meingallað. Reynt sé að breiða yfir neikvæð áhrif aukinnar umferðar.

Samtökin sendu inn athugasemdir vegna tillögunnar, en frestur til þess rann út í gær. Þau benda á að í umhverfismatinu sé talið að áhrif svifryksmengunar vegna aukinnar umferðar séu óveruleg.

Sú niðurstaða fáist með því að láta útreikninga vegna svifryksmengunar eingöngu ná til útblásturs bifreiða en ekki vegslits, sem þó sé um 85 til 90% af uppsprettu svifryksmengunar. Þetta sé tekið fram í matinu.

Samtökin segja skipulagsyfirvöld ekki geta samþykkt tillöguna „þar sem skipulega er litið fram hjá uppsprettu mengunar vegna hennar og reynt er að breiða yfir neikvæð áhrif aukinnar umferðar,“ eins og segir í athugasemdunum.

Þá segja þau að staðallinn sem stuðst sé við í hljóðvistargreiningu vegna umhverfishávaða geri hvorki ráð fyrir að hluti bifreiða aki um á nagladekkjum né þeirri staðreynd að blautt geti verið í veðri. Vitað sé að þetta auki á hávaða. Þau segja ekki hægt að samþykkja tillögu sem notist við gögn sem byggi ekki á raunverulegum aðstæðum.

Íbúasamtökin hafa áhyggjur af því að byggingin muni stórauka umferð um nærliggjandi íbúahverfi, enda sé ljóst að núverandi stofnbrautir valdi ekki aukinni umferð. Endurskoða þurfi staðsetningu spítalans, eða ráðast í gerð stokks austur fyrir Lönguhlíð og Öskjuhlíðarganga.

Bent er á að byggingarmagn hafi aukist gríðarlega frá því að staðsetningin var samþykkt, úr 120 þúsund fermetrum í 290 þúsund fermetra. Þá hafi ekkert tillit verið tekið til breyttra áherslna í nýju aðalskipulagi.

Íbúasamtökin telja að forsendur staðsetningarinnar „hafi miðað við skipulag með hringakstur í borginni, með Holtsgöngum, Hlíðarfæti og göngum undir Öskjuhlíð og Kringlumýrarbraut.“

Af þessu standi aðeins spítalinn eftir.kolbeinn@frettabladid.is