Fara ríðandi milli Látrabjargs og Gerpis

Fjórir hestamenn og sextán hestar hefja í dag leiðangur milli Látrabjargs og Gerpis, vestasta og austasta odda Íslands. Þeir sem þannig ætla ríðandi þvert yfir landið eru bræðurnir Magnús Pétursson ríkissáttasemjari og Pétur Óli Pétursson, Ólafur Finnbogason og Sigurður Sævar Sigurðsson.

Leiðinni skipta þeir í tvo áfanga. Sá fyrri er frá Látrabjargi að Vindheimum í Skagafirði, um 400 kílómetrar, og áætla þeir að vera tólf daga á þeirri leið. Síðari áfangann, úr Skagafirði til Austfjarða, hyggjast þeir geyma til næsta sumars.

Þeir lögðu upp frá Breiðavík í morgun til Bjargtanga en síðan ríða þeir austur með Látrabjargi til Keflavíkur og ljúka fyrstu dagleið að Saurbæ á Rauðasandi.

Annan daginn verður riðið frá Rauðasandi, um gamla þjóðleið um Skóg, að Haga á Barðaströnd, þriðja daginn um Reiðskörð að Brjánslæk og Flókalundi, fjórða daginn um Þingmannaheiði og niður í Vattarfjörð og Skálmarfjörð, fimmta daginn upp á Klettsháls, norður fyrir Reiphólsfjöll og niður í Þorskafjörð og sjötta degi lýkur í Saurbæ í Dölum.

Þaðan liggur leiðin næstu dagana yfir í Sælingsdal, um Laxárdalsheiði og Sölvamannagötur í Hrútafjörð, um Miðfjörð, Víðidal, Vatnsdalshóla, Húnavelli, Svínavatn og að Auðkúlurétt. Síðasta dagleiðin þann 11. júlí liggur yfir brúna yfir Blöndu við Löngumýri og að Húnaveri, yfir Vatnsskarð niður í Skagafjörð og loks að Vindheimum.