Kærð fyrir að styðja samkynhneigða

Madonna hefur verið kærð af níu aðgerðasinnum í Rússlandi. Þeir krefjast þess að hún greiði 10,5 milljónir dollara fyrir að hafa lýst yfir stuðningi sínum við réttindi samkynhneigðra á tónleikum í Sankti Pétursborg í Rússlandi á dögunum.

Í Rússlandi voru lög samþykkt í febrúar sem banna fólki að auglýsa samkynhneigð fyrir fólki undir lögaldri en á tónleikunum voru börn frá tólf ára aldri. Bleikum armböndum var dreift á tónleikunum og var fólk látið lyfta höndum með þeim í sameiningu fyrir réttindum samkynhneigðra.

Alexander Pochuyev, lögfræðingur hópsins, gaf út tilkynningu til varnar skjólstæðingum sínum. „Það er enginn að brenna neinn á báli eða að framkvæma nákvæma rannsókn. Nútíma þjóðfélög krefjast umburðarlyndis og virðingar fyrir ólíkum gildum.“