Ábyrgðin sögð liggja hjá Sýrlandsstjórn

Enginn vafi leikur lengur á því að Sýrlandsher og hrottasveitir hliðhollar Sýrlandsstjórn hafa framið stríðsglæpi og glæpi gegn mannkyni á síðustu vikum og mánuðum, né heldur að ábyrgðin sé hjá Sýrlandsstjórn.

Þetta er fullyrt í rúmlega hundrað blaðsíðna skýrslu rannsóknarnefndar á vegum mannréttindaráðs Sameinuðu þjóðanna, þar sem meðal annars eru ýtarlegar lýsingar á framferði hermanna og hrottasveita í bænum Houla í maí. Þar voru meira en hundrað manns drepnir, allt almennir borgarar og nærri helmingur þeirra börn.

Meðal annars eru stjórnarliðar sakaðir um morð, pyntingar og kynferðisofbeldi.

Í skýrslunni eru sveitir uppreisnarmanna einnig sakaðar um sams konar glæpaverk, en þó fullyrt að það hafi gerst í minna mæli og sjaldnar en glæpir stjórnarliða.

Þetta er í fyrsta sinn sem nefndin kallar afbrot stríðandi afla í Sýrlandi stríðsglæpi, því hingað til hefur verið notað varfærnara orðalag. Ástæðan er sú að Alþjóðanefnd Rauða krossins lýsti því yfir um miðjan júlí að átökin í Sýrlandi gætu ekki lengur talist neitt annað en borgarastríð. Þar með þurfa stríðandi öfl í landinu að hlíta reglum Genfarsáttmálanna um framferði í stríði.

Í skýrslunni er fjallað um tímabilið frá 15. febrúar til 20. júlí á þessu ári. Skýrslan er byggð á viðtölum við fólk á átakasvæðunum og flóttamenn frá Sýrlandi.

Nefndin segir þó að starf hennar hafi verið gert torveldara vegna þess að stjórn Bashars al Assad Sýrlandsforseta sýndi engan samvinnuvilja.

gudsteinn@frettabladid.is