Kjartan spilar fyrir Kjartan í tónleikaferð Sigur Rósar

„Við erum að gera okkar besta til að fylla í skarðið fyrir Kjartan á þessum túr,“ segir Kjartan Dagur Holm sem spilar fyrir nafna sinn á tónleikaferðalagi Sigur Rósar en sveitin fer út næstkomandi sunnudag.

Ævintýrið hefst á tónleikum í Fíladelfíu í Bandaríkjunum 29. júlí. Í maí síðastliðnum við útgáfu plötunnar Valtari var tilkynnt að Kjartan Sveinsson væri ekki hættur í hljómsveitinni en yrði fjarri góðu gamni í komandi tónleikaferð. Ævintýrið stendur út árið og fram eftir því næsta. „Ég og Ólafur Björn Ólafsson, sem var til dæmis með Jónsa á hans túr á píanói, munum ferðast með þeim í einhvern tíma,“ segir hann og tekur fram að Kjartan hafi verið afar liðtækur meðlimur og spilað á gítar sem og píanó og sungið: „Ég verð aðallega á gítar en stekk á það sem þarf hverju sinni.“

Kjartan er mikill aðdáandi Sigur Rósar og þekkir lögin vel. Hann er þó miklu meira en aðdáandi því hann er tengdur sveitinni fjölskylduböndum. „Ég og Goggi erum bræður,“ segir hann og á við Georg Holm, bassaleikara. Jafnframt er Kjartan meðlimur hljómsveitarinnar For a Minor Reflection sem hlotnaðist sá heiður að hita upp fyrir Sigur Rós í þrjár vikur í nóvember árið 2008.

Þetta er þó mun stærra batterí og hefur hann setið við að læra réttu gripin og nóturnar. „Við erum búnir að hittast núna í smá tíma og æfa. Þetta lítur allt mjög vel út og ég held að þetta verði voða flott hjá þeim,“ segir hann spenntur.

Aðspurður hve stóran þátt tónlist spili í lífi hans svarar hann: „Ég svo sem veit það ekki, þetta verður það sem tekur við næstu mánuðina. Ég hef alltaf verið í For a Minor Reflection og að sjálfsögðu hefur maður verið í skóla og dagvinnu en auðvitað er draumurinn að geta gert bara þetta, sjáum til hvenær það gerist,“ segir hann. Fyrrnefnd hljómsveit hans heldur tónleika á föstudaginn á Faktorý til að kveðja áður en Sigur Rós heldur á heimsflakk með hinum nýja Kjartani.hallfridur@frettabladid.is