Iceland Express mun stundvísari en áður

„Niðurstaðan er fyrst og fremst sú að Iceland Express hefur bætt sig mjög mikið á þessu eina ári. Stundvísi Icelandair rokkar aðeins en er alla jafna góð,“ segir Kristján Sigurjónsson sem byrjaði fyrir ári síðan að taka saman upplýsingar um stundvísi íslenskra flugfélaga. Hann segir meginniðurstöður eftir árið sýna miklar breytingar á starfsháttum Iceland Express.

Útreikningana birtir Kristján á heimasíðunni Turisti.is, sem fær hátt í tuttugu þúsund heimsóknir í hverjum mánuði.

Kristján segir að um mikið hagsmunamál neytenda sé að ræða. „Það vita allir hversu leiðinlegt það er að dúsa úti á flugvelli í marga klukkutíma, sérstaklega ef maður á pantað tengiflug. Fólk getur tapað flugmiðanum sínum ef það kemur of seint, því margir panta miðana hvern í sínu lagi og þá ber flugfélagið sem seinkar enga ábyrgð á tengifluginu.“

Að sögn Kristjáns geta ferðalangar orðið af miklum fjármunum vegna þessa. „Þetta getur verið spurning um hundruð þúsunda fyrir fólk sem á til dæmis flug til Kaupmannahafnar og þaðan til Asíu.“

Mikil vinna fer í útreikningana, en Kristján þarf að reikna út seinkanir fyrir hvert flug fyrir sig. „Þetta er ærið verkefni og getur tekið tíu til tuttugu klukkutíma á viku. Sérstaklega á sumrin þegar flugferðirnar eru margar. Ég hef til dæmis fengið þær upplýsingar frá Keflavíkurflugvelli að þar sé jafn ítarlegum gögnum ekki safnað nema af og til, vegna þess að verkefnið er svo tímafrekt.“

Fyrr á árinu hóf Kristján einnig að gera verðkannanir. Þar reiknar hann út hvað það kostar að bóka flug með fjögurra eða tólf vikna fresti. „Samkvæmt þessum tölum er sá sem borgaði miða með tólf vikna fresti hjá Iceland Express og Wow til London, að borga meira en sá sem bókaði flug með fjögurra vikna fyrirvara.“ katrin@frettabladid.is