Selastofnarnir hafa minnkað verulega

Stofnar landsels og útsels eru mun minni en þeir voru árið 1980 þrátt fyrir takmarkaða veiði frá þeim tíma. Fækkunin hefur mest orðið í Breiðafirði, Faxaflóa, við Suðurströndina og Austfirði.

Erlingur Hauksson, sjávarlíffræðingur hjá Selasetrinu á Hvammstanga, telur að tvennt komi helst til. „Það er engin ein skýring á fækkun á sel. Ein gæti verið veiði á vissum svæðum við landið, og þá ekki síst grásleppuveiðarnar grunar mig. Við Suðurland, þar sem sel hefur fækkað mikið, horfir maður helst til fækkunar á sandsíli, sem var mikilvægur hluti af fæðu dýranna.“

Erlingur hefur afturreiknað landselastofninn til aldamótanna 1900 út frá veiðitölum. Hann telur stofninn þá hafa verið um 40 þúsund dýr, og jafnvel stærri.

Í nýrri skýrslu Hafrannsóknastofnunar um ástand nytjastofna segir að árið 2011 hafi borist upplýsingar um veiðar á 396 selum við Ísland, sem er líklega mjög vantalið. Árið 1986 var veiðin á sjötta þúsund dýr.

Við Ísland er landselsstofninn nú talinn vera um ellefu þúsund dýr, eða þriðjungur þess sem hann var árið 1980. Stofn útsels er talinn vera um sex þúsund dýr, en var helmingi stærri fyrir áratug.- shá