Vilja ekki lána sýni úr Davíð

Jakob Frímann Magnússon tónlistarmaður krafðist þess fyrir Héraðsdómi Reykjavíkur í gær að fá aðgang að lífsýni Davíðs Stefánssonar skálds frá Fagraskógi. Auk þess vill hann fá aðgang að lífsýnum móður sinnar og ömmu.

Fram kom fyrir Héraðsdómi að lífsýni úr skáldinu væru til en lífsýnasafnið hefur hafnað beiðni Jakobs.

Sigurður G. Guðjónsson, lögmaður Jakobs, sagði kröfuna setta fram til að eyða þeim orðrómi sem uppi hefur verið um faðerni Bryndísar Jakobsdóttur, móður Jakobs.

Einar Karl Hallvarðsson ríkislögmaður flutti málið fyrir hönd lífsýnasafnsins, benti á að safnið yrði að virða þagnarskyldu.- ktg