Sigurlíkur Sarkozys virðast hverfandi

Sarkozy tókst engan veginn að tryggja sér sigur með frammistöðu sinni í sjónvarpskappræðum á miðvikudagskvöld. Hollande varðist harðskeyttum árásum Sarkozys af fimi og virðist hafa komið á óvart. Kosið verður á sunnudag.

Francois Hollande, forsetaefni franska Sósíalistaflokksins, er spáð 53 til 54 prósenta atkvæða í seinni umferð forsetakosninganna um næstu helgi. Nicolas Sarkozy, núverandi forseti, fær varla nema 46 til 47 prósent, verði úrslitin nálægt því sem skoðanakannanir spá.

Sarkozy virðist engan veginn hafa tekist að saxa á forskot Hollandes í sjónvarpskappræðum á miðvikudagskvöld, sem urðu líklega þær heiftarlegustu í sögu slíkra kappræðna í frönsku sjónvarpi.

Sarkozy greip hvert tækifæri til að ráðast að Hollande, sakaði hann um lygar og sagði að stefna hans myndi leiða Frakkland í glötun.

Hollande hélt hins vegar ró sinni og varð aldrei svara vant, sem virðist hafa komið áhorfendum á óvart því Hollande hefur oft komið þeim fyrir sjónir sem heldur litlaus og atkvæðalítill stjórnmálamaður.

Hollande kom líka nokkrum skotum á Sarkozy, til dæmis þegar hann sagði: „Þú ert stöðugt með orðið „lygar“ á vörunum. Er það persónulegt vandamál hjá þér?“

Hollande hefur boðað kúvendingu í sumum helstu stefnumálum Sarkozys. Meðal annars hefur hann lofað því að kalla franska herinn heim frá Afganistan hið fyrsta, og svo þverneitar hann að taka þátt í hinu nýja fjármálabandalagi evruríkjanna, sem Bretar hafa heldur ekki viljað taka þátt í.

Þegar Hollande var spurður að því hvers konar forseti hann ætlaði sér að vera, þá svaraði hann með nokkuð langri ræðu í fimmtán liðum, sem hver hófst á orðunum: „Ég, sem forseti lýðveldisins, …“

Þar lofaði hann því meðal annars að láta dómsvaldið afskiptalaust, að ætla sér ekki að taka þátt í fjársöfnun fyrir flokk sinn og að ráðherrum verði settar siðareglur, sem tryggi að þeir lendi ekki í hagsmunaárekstrum.

Þá lofar hann því að framkoma sín muni ávallt verða til fyrirmyndar. Hann ætli sér ekki að verða forseti „sem ræður öllu en ber í raun ekki ábyrgð á neinu“.

Fari svo að Hollande komist til valda verður væntanlega grannt fylgst með hvort hann efnir þessi hátíðlegu loforð.

Staða Sarkozys skánaði svo vart í gær þegar Bagdadi Ali Al-Mahmoudi, fyrrverandi forsætisráðherra Líbíu, staðfesti að stjórn Múammars Gaddafí hefði stutt kosningabaráttu Sarkozys fyrir forsetakosningarnar árið 2007 með 50 milljónum evra. Sarkozy var þá nýbúinn að vísa fréttum um slíkt algerlega á bug.

gudsteinn@frettabladid.is