Bera virðingu fyrir líkamanum

„Markmið samtakana er að stuðla að jákvæðum breytingum á viðhorfum sem tengjast holdafari og útliti fólks," segir Sigrún Daníelsdóttir, sálfræðingur og formaður nýstofnaðra íslenskra baráttusamtaka um líkamsvirðingu.

Sigrún byrjaði fyrst að vekja samfélagið til umhugsunar um þessa hluti árið 2006 þegar hún kom með megrunarlausa daginn hingað til lands. Árið 2009 byrjaði hún svo að blogga um hluti tengda heilsu og holdafari, og þaðan fór boltinn að rúlla, en í dag eru þær fjórar sem skrifa á síðuna. 

Samtök um Líkamsvirðingu voru svo formlega stofnuð þann 13. mars síðastliðinn og situr þar fimm manna stjórn, auk þess sem hópur fólks styður baráttuna á ýmsan hátt. Sigrún segir fólk oft misskilja það hver barátta þeirra sé og að samtökin hvetji fólk ekki til ólifnaðs heldur almenns heilbrigðis, óháð holdafari og útliti. Það sé þó staðreynd að átraskanir, slæmar þyngdastjórnunarleiðir og óhófleg áhersla á útlit séu alvarleg og raunveruleg vandamál í samfélaginu. 

„Líkamsvirðing felst í því að bera virðingu fyrir líkama sínum og hugsa vel um hann. Í stað þess að stjórna líkamanum með harðri hendi og þvinga hann til að vera og gera það sem við viljum," segir Sigrún í einni færslu sinni á bloggsíðu.

Líkamsvirðing kemur til með að standa fyrir átakinu „Fyrir hvað stendur þú" í tengslum við megrunarlausa daginn í maí. Öllum er velkomið að taka þátt með því að senda inn mynd af sér með slagorði sem segir til um hvað þau standi fyrir eða gegn í stríðinu um líkamann. Nánar má lesa um átakið og baráttuna á síðunni blog.eyjan.is/likamsvirding.