Vinkonur opna verslun í anda Urban Outfitters

„Þetta hefur verið draumur hjá okkur lengi," segir Kristín Ásta Matthíasdóttir sem ásamt vinkonu sinni, Oddnýju Jónu Bárðardóttur, undirbýr opnun tískuvöruverslunarinnar Dótturfélagið.

Áætluð opnun búðarinnar er í byrjun apríl en Kristín og Oddný stukku á heppilegt húsnæði á Laugaveginum þegar það losnaði í byrjun árs og hafa sjálfar staðið í ströngu við að fullkomna útlit búðarinnar. „Ég held að við getum kallað okkur iðnaðarkonur eftir þetta. Við höfum reynt að gera allt sjálfar," segir Oddný og bætir við: „við vorum tvær á 80 kílóa vél í þrjá daga að pússa allt upp. Það var lífsreynsla."

Stúlkurnar stefna á að opna í byrjun apríl. Dótturfélagið verður verslun í anda búðarinnar Urban Outfitters með nýjustu götutískuna í bland við fallega húsbúnaðarvöru en þær verða með sérvalda hönnun frá Epal til sölu.

„Við erum á leiðinni til London á næstu dögum til að velja fyrstu flíkurnar inn í búðina. Við ætlum að fara reglulega út og kaupa inn vörur frá London, París og Mílanó þar sem margar skemmtilegar heildsölur er að finna með nýjustu tísku," segir Kristín en þær eru sannfærðar um að búðin smellpassi inn í búðaflóru miðbæjarins. „Þetta er hvorki hönnunar- né vintage-búð heldur verslun sem býður upp á nýjustu tísku í fallegu umhverfi. Við erum samt mjög hrifnar af íslenskri hönnun og myndum gjarna vilja selja fatalínu eftir íslenskan hönnuð í framtíðinni."

Nafn búðarinnar, Dótturfélagið, er sameiginleg hugmynd þeirra beggja. „Flestar konur á Íslandi eru einhvers-dóttir og föðurnöfnin tengja íslenskar konur saman í dótturfélag," segir Oddný en í búðinni verður sérstakur veggur sem þær kalla mæðgnavegginn og verður þakinn myndum af smart klæddum íslenskum mæðgum.

„Við erum komnar í draumastarfið. Fáum að vinna saman innan um falleg föt í okkar eigin búð." Hægt er að fylgjast með búðinni á Facebook undir nafninu Dótturfélagið. alfrun@frettabladid.is