Lífið

Kutcher mætti á opnun Evu Maríu í Hollywood

Kvikmyndaframleiðandinn Eva María Daníels stofnaði nýverið listagallerí á netinu og var fjölmennt á opnunarkvöldinu í Hollywood þar sem Ashton Kutcher og Melanie Griffith voru meðal gesta.
Kvikmyndaframleiðandinn Eva María Daníels stofnaði nýverið listagallerí á netinu og var fjölmennt á opnunarkvöldinu í Hollywood þar sem Ashton Kutcher og Melanie Griffith voru meðal gesta. Nordicphotos/getty
„Það var svakalega gaman á opnunarkvöldinu og gestirnir mjög hrifnir," segir framleiðandinn Eva María Daníels sem nýverið stofnaði listagallerí á netinu undir nafninu Gallery for the People.

Listagalleríið er hliðarverkefni hjá Evu Maríu sem hefur getið sér góðs orðs sem kvikmyndaframleiðandi en hún er búsett í Los Angeles. Í galleríinu verða til sýnis verk eftir nýja jafnt sem rótgróna listamenn þar sem netið er sýningarrýmið.

„Ég hef alltaf verið mjög heilluð af list og þekki mjög marga sem deila þessum áhuga, en búa út um allan heim og hafa því ekki tækifæri til að sækja allar þær sýningar sem þeir vilja. Þess vegna fannst mér sniðugt að nota netið sem sýningarrými og leyfa þá öllum að hafa jafnan aðgang að sýningunum, sama hvort þeir vilji bara skoða eða festa kaup á verkunum."

Reglulega ætlar Eva María að halda svokallaðar „pop up" sýningar en hún gerir sér grein fyrir að sumir geta ekki keypt list án þess að sjá verkin berum augum. Fyrsta sýning Evu Maríu var haldin í sýningarrými Soho House í Hollywood í síðustu viku þar sem stjörnur á borð við Ashton Kutcher, Melanie Griffith og Danny Masterson voru meðal gesta. Gestgjafi kvöldsins var leikkonan Dakota Johnson en hún lék einmitt eitt af aðalhlutverkunum í seinustu mynd sem Eva Maríu framleiddi, Goats.

Hinn nýskildi Ashton Kutcher lék á als oddi ásamt gamla félaga sínum úr sjónvarpsþáttunum That ´70s Show, Danny Masterson.
„Það er gaman að geta sameinað starfsemi gallerísins og framleiðslufyrirtækisins að einhverju leyti. Dakota Johnson er yndisleg og safnaði saman mjög skemmtilegu fólki á þessa fyrstu sýningu. Melanie Griffith var hrifin og keypti tvær myndir af okkur," segir Eva María

Hægt er að fylgjast með og skoða galleríið á síðunni Galleryforthepeople.com. - áp






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.