Pútín hefur aftur hreppt forsetaembætti Rússlands

Vladimír Pútín sigraði í forsetakosningum í Rússlandi í gær og fékk um það bil 60 prósent atkvæða. Útgönguspár höfðu talið að hann fengi 58 til 59 prósent, en samkvæmt fyrstu opinberu tölum úr atkvæðatalningu fékk hann um 63 prósent.

Pútín verður því forseti Rússlands aftur, eftir að hafa verið forsætisráðherra í eitt kjörtímabil. Gennadí Sjúganov, leiðtogi Kommúnistaflokksins, fékk um 18 prósent en aðrir frambjóðendur fengu innan við tíu prósent hver.

Þar sem Pútín fékk meira en helming atkvæða sleppur hann við aðra umferð kosninganna, þar sem kjósendur hefðu þurft að velja á milli þeirra tveggja frambjóðenda sem flest atkvæði fengju.

Almennt hefur verið reiknað með því að Dmitrí Medvedev, sem gegnt hefur forsetaembættinu meðan Pútín hefur verið forsætisráðherra, skipti aftur við hann um embætti og verði forsætisráðherra á ný. Það er þó engan veginn víst.

Andstæðingar Pútíns segja að mikið hafi verið um kosningasvindl í gær. Meðal annars hafa borist margar fregnir af því að kjósendur hafi farið frá einum kjörstað til annars og hindrunarlaust getað greitt atkvæði á mörgum stöðum.

Ef óháðir kosningaeftirlitsmenn staðfesta þessar ásakanir þá má búast við að mótmæli gegn Pútín færist í aukana næstu daga og vikur.

Eftir að upp komst um kosningasvik í þingkosningunum í desember héldu tugir þúsunda út á götur að mótmæla Pútín. Þetta urðu öflugustu mótmæli almennings í Rússlandi gegn stjórnvöldum frá því Sovétríkin liðu undir lok.

Pútín hefur reynt að gera lítið úr þessum mótmælum, segir þau bundin við lítinn minnihluta og jafnvel runnin undan rifjum stjórnvalda á Vesturlöndum, sem vilji grafa undan Rússlandi.

Mótmælendur fengu ekki leyfi stjórnvalda til að koma saman á stóru torgi við Kremlarmúra í gær, en veittu þeim heimild til að efna til fundar á minna torgi skammt frá í dag.

Stuðningsmenn Pútíns fengu hins vegar leyfi til að koma saman á stóra torginu í Moskvu í gær. Þangað flykktust síðan meðal annars starfsmenn ríkisfyrirtækja, sem sögðu yfirmenn sína hafa hótað þeim refsingu sem létu ekki sjá sig þar.

Skoðanakannanir höfðu samt undanfarið sýnt að Pútín nýtur mikilla vinsælda meðal almennings, þrátt fyrir ásakanir um útbreidda spillingu og valdníðslu víða í stjórnkerfinu.

Efnahagsbati og stöðugleiki undanfarinna ára hefur verið mörgum Rússum kærkominn í kjölfar umrótsins á síðasta áratug 20. aldar, þegar Boris Jeltsín réði þar ríkjum eftir hrun Sovétríkjanna.

gudsteinn@frettabladid.is