Menntun ábyrgra stjórnenda – ábyrgð háskóla

Leiðtogar dagsins í dag, hvort sem er í stjórnmálum eða viðskiptalífi, standa frammi fyrir áskorunum á borð við umhverfisvá sem fylgir vaxandi velmegun í heiminum, að ekki sé talað um aðra þætti mannlegs atferlis sem ógnað geta mannlegu samfélagi á borð við spillingu og slæma stjórnarhætti. Það er mikilvægt fyrir framtíð alls mannkyns að leiðtogar framtíðarinnar taki á slíkum viðfangsefnum af ábyrgð og virðingu fyrir komandi kynslóðum en láti ekki skammtímasjónarmið ráða för.

Háskólar gegna hér lykilhlutverki, þeir mennta forystufólk í viðskiptalífi, í stjórnmálum og í vísindum og eigi það markmið að takast að innleiða hugsun sjálfbærni og samfélagsábyrgðar inn í framtíðarstefnumótun, þá þurfa háskólarnir að vera í broddi þeirrar fylkingar.

Menningarmálastofnun Sameinuðu Þjóðanna (UNESCO) hefur tilnefnt áratuginn 2005-2014 áratug menntunar til sjálfbærrar þróunar en markmiðið með því er að tvinna lögmál, gildi og viðhorf sjálfbærrar þróunar inn í alla kennslu og starfsemi menntastofnana og auka þannig vitund og skilning skólasamfélagsins á sjálfbærni og samfélagslegri ábyrgð.

Átak SÞ til menntunar ábyrgra leiðtogaHáskólar um allan heim hafa eftir að efnahagskreppan skall á verið gagnrýndir fyrir það að hafa útskrifað fólk sem hafi einkum haft gróðahyggju og skammsýni að leiðarljósi við ákvarðanatöku en síður lagt áherslu á gott siðferði, góða stjórnarhætti, samfélagsábyrgð og virðingu fyrir umhverfi og hagsmunum heildarinnar.

Í tengslum við áratug SÞ um menntun til sjálfbærrar þróunar hefur verið komið á fót sameiginlegu átaki þeirra menntastofnana sem vilja vinna markvisst að því að mennta ábyrga stjórnendur (PRME – Principles for responsible management education). Nú þegar hafa um fjögur hundruð menntastofnanir skráð sig til þátttöku í átakinu, en Háskólinn á Bifröst er fyrstur íslenskra háskóla til að undirrita viljayfirlýsingu PRME. Átakið styður menntastofnanir til að aðlaga kennsluskrá sína, rannsóknir, kennsluaðferðir og daglega starfsemi að hugmyndafræði sjálfbærrar þróunar á kerfisbundinn hátt. Á meðal þátttakenda eru margir virtustu viðskiptaháskólar heims en þátttakendur hafa skipulagt samstarf sín á milli og miðla hver öðrum af reynslu sinni af þátttökunni.

Sex markmiðStefna Háskólans á Bifröst er í endurskoðun með hliðsjón af markmiðum um menntun ábyrgra stjórnenda og verður ný stefna kynnt fyrir mitt ár 2012. Átakið byggir á 6 markmiðum sem þátttakendur skuldbinda sig til að vinna að til en þau eru þessi í stuttu máli;

• að efla með markvissum hætti færni nemenda til að vinna að sjálfbæru hagkerfi í heiminum
• að endurspegla hugmyndafræði sjálfbærrar þróunar og samfélagsábyrgðar í námsskrá, námsefni og kennslufræði skólans
• að bjóða upp á aðstæður og aðbúnað í háskólanum sem gera nemendum kleift að efla færni sína sem ábyrgir stjórnendur
• að stunda rannsóknir sem auka skilning á hlutverki og mögulegum áhrifum fyrirtækja á þróun félagslegra, umhverfislegra og efnahagslegra gilda
• að leita eftir virku samstarfi við fyrirtæki til að auka skilning á þeim samfélagslegu og umhverfislegu áskorunum sem þau standa frammi fyrir og þróa í samstarfi við þau leiðir til að takast á við þær áskoranir
• að standa fyrir gagnrýnni umræðu á meðal fyrirtækja, fjölmiðla og annarra áhugasamra hagsmunahópa í samfélaginu um sjálfbærni og samfélagsábyrgð.

Við Háskólann á Bifröst er nú unnið markvisst að innleiðingu markmiðanna og hefur verið ráðinn sérstakur starfsmaður á skrifstofu rektors til að fylgja þeim eftir með endurskoðun allra námskeiðslýsinga, kennslufræði og annarra þátta í starfsemi skólans. Ljóst er að til að slík innleiðing náist þurfa allir starfsmenn og nemendur skólans að koma að henni og hún verður ekki unnin á einni nóttu. Það þarf sífellt að hafa vökult auga fyrir því að eftir markmiðunum sé unnið. Það er von okkar að fyrsta þætti innleiðingarinnar, að festa markmiðin í opinbera stefnu skólans, verði lokið fyrir mitt þetta ár ásamt því að endurskoða allar námskeiðslýsingar með hugmyndafræði sjálfbærrar þróunar að leiðarljósi.