Dönsku dómararnir duglegir að láta sjá sig í norskum fjölmiðlum

Eins ótrúlega og það hljómar hafa dönsku dómararnir sem dæmdu leik Íslands og Noregs komið mikið fram í norskum og dönskum fjölmiðlum eftir leikinn.

Norðmenn voru ósáttir við ákvörðun þeirra um að dæma ekki víti á Vigni Svavarsson á lokamínútu leiksins en Ísland vann leikinn að lokum, 34-32. Vítið hefði hugsanlega getað bjargað jafntefli fyrir Norðmenn.

Sérfræðingur TV2 í Noregi, Harald Bredeli, varð frávita af reiði og blótaði dönsku dómurnum í sand og ösku. Þjálfarar og leikmenn norska liðsins helltu sér yfir dómarana eftir leikinn, bæði við þá sjálfa og í viðtölum við fjölmiðla eftir leikinn. Hornamaðurinn Lars Erik Björnsen sagði réttast væri að láta serbnesku lögregluna hirða dómarana.

Norska handknattleikssambandið var sektað um þúsund evrur vegna mótmælanna og aðstoðarþjálfari liðsins dæmdur í eins leiks bann.

Norskir fjölmiðlar fylgdu svo málinu eftir í gær og töluðu mikið við leikmenn og þjálfara norska liðsins. En þeir ræddu einnig við danska dómaraparið sem fengu til að mynda að hlusta á orðaflaum Bredeli og rætt við þá vegna þess. Það má sjá hér.

Þá hitti annar dómaranna sjálfan Bredeli að máli sem baðst afsökunar og tókust þeir í hendur. Það má sjá hér.

Óvíst er hvort að dönsku dómararnir munu dæma aftur á mótinu en það verður að teljast líklegt. Þó líklega ekki leik með norska landsliðinu - ef það kemst áfram í milliriðlakeppnina.