Eins og forystumenn Samfylkingar "hafi ekki aðgang að internetinu"

Ef Ísland væri aðili að Evrópusambandinu og Evrópska myntbandalaginu með evru mætti gera ráð fyrir að ábyrgðir íslenska ríkisins vegna björgunarsjóðs evrunnar væru um 115 milljarðar króna. Þetta segir þingmaður Sjálfstæðisflokksins en hann byggir þetta á útreikningum sem hann hefur tekið saman.

Þetta jafngildir rúmlega 362 þúsund krónum á hvern einstakling eða rúmlega 1,4 milljónum króna á hverja fjögurra manna fjölskyldu.

Þetta kemur fram í útreikningum sem Guðlaugur Þór tók saman með aðstoð upplýsingaþjónstu Alþingis, en frá þessu er greint í Morgunblaðinu í dag.

Guðlaugur Þór segir einnig að Ísland þyrfti að borga um níu til ellefu milljarða króna á ári í sameiginleg fjárlög Evrópusambandsins. Þessi fjárhæð er fundin út með samanburði við Möltu, sem er ESB-ríki, þar sem íbúafjöldi er svipaður og hér, en Malta greiðir 1 prósent þjóðartekna sinn í fjárlög ESB, eða um 55 milljónir evra.

Heppin að vera ekki með evru

„Það er enginn vafi á því að við erum mjög heppin að vera ekki í Evrópska myntbandalaginu núna og ég furða mig mikið á þessari umræðu sem hefur verið í íslenskum fjölmiðlum. Sérstaklega furða ég mig á ummælum ýmissa forystumanna Samfylkingarinnar en það er hreinlega eins og þessir aðilar hafi ekki aðgang að internetinu. Alls staðar er umræðan þannig að það er augljóst að um mjög stóran vanda er að ræða. Meðal annars því menn fóru í þetta myntsamstarf án þess það væru efnahagslegar forsendur fyrir því, en voru fyrst og fremst að gera þetta til að auka samrunann í álfunni og vilja núna taka á þessum vanda með enn meiri samruna og miðstýringu," segir Guðlaugur Þór.

Þorsteinn Pálsson, fyrrverandi formaður Sjálfstæðisflokksins, gagnrýnir flokkinn í vikulegum pistli í Fréttablaðinu í dag og segir að „Sjálfstæðisflokkurinn (þurfi) að sýna skýrari áætlun um hvernig ná á Íslandi út úr pólitískri blindgötu stjórnarflokkanna í efnahagsmálum og (koma með) trúverðugri hugmyndir um stöðu Íslands í alþjóðasamfélaginu til lengri tíma."

Þurfið þið sjálfstæðismenn ekki að koma með einhverja stefnu í peningamálum? Eða er það stefna flokksins að það sé best að vera með krónuna áfram?

„Það er alveg ljóst að eitt af stóru málunum er breytt peningastefna, en ég vil vekja athygli á því að efnhagstillögur Sjálfstæðisflokksins hafa ekki fengið mikla umfjöllun í fjölmiðlum. Ef umræðan mun snúast um að flokkarnir muni takast á um mismunandi hugmyndir, þá er það vel. Það er alveg ljóst að sú peningastefna sem nú er í gangi, hún gengur ekki upp. Það er líka ljóst að það er ekki hægt að bjóða fólki upp á að segja að evran og ESB sé lausn á okkar vanda og eitthvað himnaríki á jörðu. Því fer víðs fjarri og menn verða að ræða þessi mál út frá staðreyndum," segir Guðlaugur Þór.

Sjálfstæðisflokkurinn hefur ekki kynnt breytta stefnu í peningamálum og hefur því ekki lagt áherslu á annað en að íslenska krónan sé framtíðargjaldmiðill Íslands. thorbjorn@stod2.is