Konan í Kaupmannahöfn komin til meðvitundar

Íslenska konan sem féll í Peblingevatnið á Nörrebro í Kaupmannahöfn í nótt er komin til meðvitundar en henni var haldið í öndunarvél á gjörgæsludeild Rigshospitalet eftir að henni var bjargað úr vatninu.

Eins og fram hefur komið í fréttum í dag var konan í um 40 mínútur í ísköldu vatninu áður en kafarar fundu hana og hífðu upp í björgunarþyrlu sem flutti hana á gjörgæsludeild. Hún þjáðist þá af alvarlegri ofkælingu.

Í nýrri frétt um málið í Ekstra Bladet segir að líkamshiti konunnar sé nú kominn í 36 gráður og að hún sé á batavegi og ekki lengur í lífshættu.

Fram kemur í fréttinni að konan, sem er 27 ára gömul, verði ekki útskrifuð frá Rigshospitalet fyrr en í fyrsta lagi eftir að líkamshiti hennar er orðinn eðlilegur að nýju.