Lögreglan leitar að byssumanni - myndband af vopnuðu ráni

Vopnaður karlmaður hleypti af skotvopni þegar hann réðst inn í söluturn í Reykjavík seint í gærkvöldi. Lögreglan leitar mannsins.

Það var klukkan hálf tólf í gærkvöldi eða rétt fyrir lokun sem að karlmaður vopnaður byssu réðst inn í söluturn við Grundarstíginn. Þessar myndir sem hér sjást eru úr eftirlitsmyndavélum á staðnum. Ræninginn ógnaði rúmlega tvítugum afgreiðslumanni með byssu og sagði um rán að ræða. Sá opnaði strax peningakassann. Talið er að ræninginn hafi haft á brott með sér um 30 þúsund krónur.

Ræninginn hljóp svo út og niður Skálholtsstíg og hringdi þá afgreiðslumaðurinn strax á lögreglu sem var mætt innan nokkurra mínútna.

Afgreiðslumaðurinn taldi ræningjann hafa hleypt af byssunni sem hann var með. Eins og sést á þessum myndum lóð hann byssuna tvisvar á meðan hann var inni. Lögregla telur víst að hleypt hafi verið af skotvopni og fann ummerki um það á staðnum. Hins vegar er enn óljóst um hvers konar skotvopn var að ræða. Eigandi söluturnsins treysti sér ekki í viðtal í dag en sagði starfsmann sinn vera ómeiddan. Hann hafi verið fluttur á bráðamóttöku Landspítalans í nótt þar sem hann fékk áfallahjálp.

Sérsveit ríkislögreglustjóra var kölluð út og leitaði hún ásamt lögreglumönnum á höfuðborgarsvæðinu að ræningjanum í nótt. Leit stendur enn yfir og biður lögregla alla þá sem hugsanlega hafa verið á ferli við söluturninn þegar ránið átti sér stað klukkan hálf tólf í gærkvöldi að hafa samband í síma 444-1000