Strokudrengirnir komnir í leitirnar

Hælisleitendurnir sem reyndu að smygla sér um borð í vél Icelandair í sumar fundust í ágúst um borð í flutningaskipi á Englandi.

Við sögðum frá því í fréttum okkar í gær að þeim Adam Aamer og Alhawari Agukourchi, sem voru handteknir þar sem þeir reyndu að smygla sér um borð í þotu Icelandair í júlí, hefði tekist ætlunarverk sitt skömmu síðar og því væri ákæra gegn þeim í uppnámi. Mennirnir höfðu um fjögurra mánaða skeið verið hælisleitendur hér á landi.

Samkvæmt upplýsingum frá Alþjóðadeild ríkislögreglustjóra virðist sem piltunum hafi tekist að smygla sér um borð í flutningaskip Samskipa, Ms Helgafell, sem var á leið til Evrópu. Í viðtali við fréttastofu skömmu eftir flóttatilraunina í júlí sögðust þeir enda oftsinnis hafa gert misheppnaðar tilraunir til að komast úr landi með þessum hætti. Það bar loks árangur í ágúst.

Fyrsti viðkomustaður Helgafellsins var í borginni Immingham á Englandi og við komuna þangað uppgötvaðist um veru þeirra um borð. Þeir voru handteknir af lögreglu og samkvæmt ríkislögreglustjóra hafa engar frekari upplýsingar borist frá breskum yfirvöldum vegna málsins.

Ríkissaksóknari hafði birt ákært mennina fyrir að fara um borð í þotuna og fyrir að brjótast inn á flugvallarsvæðið en þegar upp komst um að þeir hefðu flúið land var málið endursent úr dómi og er það nú í bið. Samkvæmt upplýsingum frá saksóknara hefur ekki verið ákveðið hvort ákæran gegn þeim verði send til meðferðar í Englandi, en slíkt kemur til greina.